బంగ్లాదేశ్‌ వాయుసేన మాజీ అధికారి అనుమానాస్పద మృతి

బంగ్లాదేశ్‌ వాయుసేన మాజీ ఫ్లైట్‌ లెఫ్టినెంట్‌ కె.ఎం. తహసిఫ్‌ సూరి అనుమానాస్పద స్థితిలో మృతి చెందారు. ఆయన మృతదేహాన్ని ఢాకాలోని తురాగ్‌ నదిలో గుర్తించినట్లు పోలీసులు గురువారం వెల్లడించారు. రాజాబారి ఘాట్‌ ప్రాంతంలో మృతదేహం లభ్యమైనట్లు తెలిపారు. 2024లో పదవీచ్యుతురాలైన అప్పటి ప్రధాని షేక్‌ హసీనా దేశం విడిచి వెళ్లిన దృశ్యాలను తహసిఫ్‌ సూరి వీడియోగా చిత్రీకరించినట్లు గతంలో వార్తలు వచ్చాయి. ఈ నేపథ్యంలో ఆయన మరణం చర్చనీయాంశంగా మారింది.

తహసిఫ్‌ సూరిని 2024లో విధుల నుంచి తొలగించారు. ఆయనపై ప్రభుత్వం నిఘా ఉంచినట్లు విశ్వసనీయ వర్గాలు తెలిపినట్లు సమాచారం. మంగళవారం తల్లితో కలిసి రోజంతా షాపింగ్‌ చేసిన ఆయన, అదే సాయంత్రం ఇంటి నుంచి బయటకు వెళ్లి తిరిగి రాలేదు. ఆ తర్వాత ఆయన మృతదేహం నదిలో లభ్యమైంది. అయితే ఆయన మరణానికి దారితీసిన పరిస్థితులు, కారణాలపై పోలీసులు ఇంకా పూర్తి వివరాలు వెల్లడించలేదు.