ఓటర్ల జాబితా ప్రక్రియపై ఈసీకి మాజీ సీఈసీల సూచనలు..

ఓటర్ల జాబితాల సవరణ, నమోదు ప్రక్రియకు సంబంధించిన నిర్ణయాలపై ముగ్గురు ఎన్నికల కమిషనర్ల మధ్య విభేదాలు ఉన్నాయంటూ వచ్చిన వార్తలపై మాజీ ప్రధాన ఎన్నికల కమిషనర్లు ఎస్‌.వై. ఖురేషీ, ఓపీ రావత్‌ స్పందించారు. ఎన్నికల కమిషన్‌ నిర్ణయాలు ఏకాభిప్రాయం లేదా మెజారిటీ ప్రాతిపదికన తీసుకోవాల్సి ఉంటుందని ఖురేషీ పేర్కొన్నారు. గత ఏడాదిన్నర కాలంలో కమిషన్‌ తీసుకున్న కీలక నిర్ణయాలను, అవి ఏ విధంగా తీసుకున్నారో ప్రజలకు వెల్లడించడం ద్వారా పారదర్శకత పెరుగుతుందని ఆయన అభిప్రాయపడ్డారు.

కమిషనర్ల మధ్య విభేదాలు తీవ్రంగా ఉన్నాయన్న వార్తలు ఆందోళన కలిగిస్తున్నాయని ఓపీ రావత్‌ అన్నారు. తాను ప్రధాన ఎన్నికల కమిషనర్‌గా ఉన్న సమయంలో నిర్ణయాలు ఏకగ్రీవంగానే తీసుకున్నామని గుర్తుచేశారు. అయితే ఎన్నికల కమిషన్‌ మాత్రం భిన్నాభిప్రాయాలు సంస్థాగత చర్చల్లో సాధారణమేనని, తన అధికారిక నిర్ణయాలు, ఆదేశాలకు చట్టబద్ధత ఉందని స్పష్టం చేసింది. ప్రత్యేక ఓటర్ల జాబితా సవరణ (SIR), ఓటరు నమోదు ప్రక్రియలో మార్పులకు సంబంధించి ఎన్నికల కమిషనర్లు సుఖ్‌బీర్‌ సింగ్‌ సంధు, వివేక్‌ జోషి అభ్యంతరాలు వ్యక్తం చేసినట్లు వార్తలు వెలువడ్డాయి.