అసైన్డ్ భూముల క్రమబద్ధీకరణపై ప్రభుత్వం ఆలోచన

తెలంగాణ రెవెన్యూ మంత్రి పొంగులేటి శ్రీనివాసరెడ్డి అసైన్డ్ భూముల క్రమబద్ధీకరణపై ప్రభుత్వం ఆలోచన చేస్తున్నట్లు తెలిపారు. ఈ అంశంపై ఇప్పటికే రెండు సార్లు అనౌపచారికంగా కేబినెట్‌లో చర్చ జరిగిందని, ఇది పాలసీ అంశం కావడంతో మరిన్ని చర్చల అనంతరం ముఖ్యమంత్రి రేవంత్ రెడ్డి ఆధ్వర్యంలోని కేబినెట్ తుది నిర్ణయం తీసుకుంటుందని వెల్లడించారు.

అసైన్డ్ భూములు పొందిన వారిలో చాలామంది వాటిని విక్రయించారని, మరికొందరు ఇళ్లను నిర్మించుకున్నారని మంత్రి తెలిపారు. భవిష్యత్తులో క్రమబద్ధీకరణ జరుగుతుందని భావించి పెద్ద ఎత్తున భూములు కొనుగోలు చేసిన వారిపై ఫీజు లేదా భూ పరిమితి వంటి నిబంధనలు తీసుకురావాలని ప్రతిపాదించారు. భూ భారతి కమిటీ ఫాస్ట్‌ట్రాక్ కోర్టు తరహాలో పనిచేస్తుందని, సుమారు 300 గ్రామాల్లో రీ-సర్వే కొనసాగుతోందని, పట్టా కంటే కబ్జాలో ఉన్న భూమికే ప్రాధాన్యం ఇస్తామని చెప్పారు. ప్రభుత్వం, పార్టీ మధ్య సమన్వయం బాగుందని కూడా మంత్రి పేర్కొన్నారు.