భారత్‌-పాక్‌ సరిహద్దులో హైటెన్షన్‌.. బీఎస్‌ఎఫ్‌ కాల్పుల్లో ఇద్దరు మృతి

పంజాబ్‌లోని తరణ్‌ తారన్‌ జిల్లాలో భారత్‌-పాకిస్థాన్‌ సరిహద్దు వద్ద చొరబాటుకు ప్రయత్నం జరిగినట్లు అధికారులు తెలిపారు. సరిహద్దు భద్రతా దళం (బీఎస్‌ఎఫ్‌) సిబ్బంది అనుమానాస్పద కదలికలను గుర్తించి హెచ్చరించినప్పటికీ, వారు వెనక్కి తగ్గకుండా భారత భూభాగం వైపు కదిలినట్లు సమాచారం. దీంతో పరిస్థితిని అదుపులోకి తీసుకురావడానికి బీఎస్‌ఎఫ్‌ సిబ్బంది కాల్పులు జరిపారు.

ఈ కాల్పుల్లో ఇద్దరు అనుమానిత చొరబాటుదారులు మృతి చెందినట్లు సమాచారం. మరో వ్యక్తి తిరిగి పాకిస్థాన్‌ వైపు పారిపోయినట్లు అధికారులు వెల్లడించారు. ఘటన అనంతరం సరిహద్దు ప్రాంతంలో భద్రతా బలగాలు అప్రమత్తమై, పరిసర ప్రాంతాల్లో తనిఖీలు చేపట్టినట్లు తెలుస్తోంది. ఘటనకు సంబంధించిన పూర్తి వివరాలు, మృతుల గుర్తింపు వంటి అంశాలపై అధికారిక సమాచారం వెలువడాల్సి ఉంది.