ఇంట్లోకి కొత్త లుక్.. కరెంట్‌ ఆదాతో భారీ గాలి.. HVLS ఫ్యాన్ల ప్రత్యేకతలు ఇవే!

ఈ మధ్య కాలంలో ఫంక్షన్‌ హాళ్లు, సమావేశ మందిరాలు, దేవాలయాలు, ఆధునిక ఇళ్లలో పెద్ద రెక్కలతో కూడిన ఫ్యాన్లు ఎక్కువగా కనిపిస్తున్నాయి. వీటిని HVLS (హై-వాల్యూమ్-లో-స్పీడ్‌) ఫ్యాన్లు లేదా లార్జ్‌ బ్లేడ్‌ డిజైనర్‌ ఫ్యాన్లు అని పిలుస్తారు. ఇవి నెమ్మదిగా తిరిగినా ఎక్కువ పరిమాణంలో గాలిని విస్తృతంగా ప్రసారం చేస్తాయి. చాలా మోడళ్లలో BLDC మోటార్లను ఉపయోగించడం వల్ల సాధారణ ఫ్యాన్లతో పోలిస్తే విద్యుత్‌ వినియోగం గణనీయంగా తగ్గే అవకాశం ఉంటుంది. ఏరోడైనమిక్‌ బ్లేడ్‌ డిజైన్‌ కారణంగా గది అంతటా గాలి సమానంగా ప్రసరించడంతో పాటు శబ్దం కూడా చాలా తక్కువగా ఉంటుంది. కొన్ని మోడళ్లలో శీతాకాలంలో వేడి గాలిని గది అంతటా ప్రసరించేలా రివర్స్‌ మోడ్‌ కూడా ఉంటుంది.

అయితే వీటికి కొన్ని పరిమితులు కూడా ఉన్నాయి. సాధారణ ఫ్యాన్ల మాదిరిగా వేగంగా గాలి వీసే అనుభూతి కావాలనుకునేవారికి HVLS ఫ్యాన్లు కొంత నెమ్మదిగా అనిపించవచ్చు. BLDC మోటార్లు, ఎలక్ట్రానిక్‌ సర్క్యూట్‌ బోర్డులు దెబ్బతింటే ప్రత్యేక సర్వీసింగ్‌ అవసరం కావచ్చు. సరైన గాలి ప్రసరణ, భద్రత కోసం సాధారణంగా 9 నుంచి 10 అడుగుల సీలింగ్‌ ఎత్తు అనుకూలంగా ఉంటుంది. కొన్ని మోడళ్లను రిమోట్‌ ద్వారానే నియంత్రించాల్సి ఉంటుంది. టైమర్‌, స్లీప్‌ మోడ్‌, Wi-Fi, Bluetooth, Alexa, Google Home వంటి స్మార్ట్‌ ఫీచర్లు ఉన్న ప్రీమియం మోడళ్లు కూడా అందుబాటులో ఉన్నాయి. బ్లేడ్‌ సైజు, డిజైన్‌, ఫీచర్లను బట్టి వీటి ధర సాధారణంగా రూ.5 వేల నుంచి రూ.10 వేల వరకు లేదా అంతకంటే ఎక్కువగా ఉండొచ్చు.