ఖైరతాబాద్‌ గణేషుడి వద్ద సీపీ సజ్జనార్‌.. నిమజ్జన ఏర్పాట్ల పరిశీలన

హైదరాబాద్‌ పోలీస్‌ కమిషనర్‌ సజ్జనార్‌ ఖైరతాబాద్‌ గణేషుడిని దర్శించుకుని నిమజ్జన ఏర్పాట్లను క్షేత్రస్థాయిలో పరిశీలించారు. బడా గణేశుడికి ప్రత్యేక పూజలు నిర్వహించిన ఆయన.. నిమజ్జన కార్యక్రమాన్ని ప్రశాంత వాతావరణంలో నిర్వహించేలా పోలీస్‌ శాఖ అన్ని చర్యలు చేపట్టిందని తెలిపారు. శోభాయాత్ర సందర్భంగా ట్రాఫిక్‌ మళ్లింపులు ఉంటాయని, ప్రజలు పోలీసుల సూచనలను గమనించి సహకరించాలని కోరారు.

నిమజ్జనాల సందర్భంగా నగరవ్యాప్తంగా భారీ బందోబస్తు ఏర్పాటు చేసినట్లు సజ్జనార్‌ తెలిపారు. శోభాయాత్రపై టీజీఐసీసీసీ నుంచి నిరంతరం నిఘా కొనసాగుతుందని, ప్రధాన మార్గాల్లోని సీసీ కెమెరాలను కమాండ్‌ కంట్రోల్‌ సెంటర్‌కు అనుసంధానం చేసినట్లు వెల్లడించారు. రద్దీ ప్రాంతాల్లో మహిళల భద్రత కోసం షీ-టీమ్స్‌ను పలు షిఫ్టుల్లో విధుల్లో ఉంచినట్లు తెలిపారు.