రజనీ–కమల్‌ మల్టీస్టారర్‌పై క్రేజీ అప్‌డేట్‌

‘జైలర్‌ 2’తో మరో భారీ విజయాన్ని అందుకున్న సూపర్‌స్టార్‌ రజనీకాంత్‌ ప్రస్తుతం అశ్వత్‌ మారిముత్తు దర్శకత్వంలో తెరకెక్కుతున్న ‘ధర్మన్‌’ చిత్రాన్ని పూర్తి చేసే పనిలో ఉన్నారు. ఈ సినిమా పూర్తయిన తర్వాత ఆయన మరోసారి దర్శకుడు నెల్సన్‌ దిలీప్‌కుమార్‌తో కలిసి పనిచేయనున్నారు. ఈ క్రేజీ కాంబినేషన్‌కు విశ్వనటుడు కమల్‌హాసన్‌ కూడా జతకలవనుండటంతో ఈ ప్రాజెక్టుపై ప్రేక్షకుల్లో ఆసక్తి మరింత పెరిగింది. ఇప్పటికే అధికారికంగా ప్రకటించిన ఈ భారీ మల్టీస్టారర్‌ వచ్చే ఏడాది పొంగల్‌ సందర్భంగా ప్రారంభం కానున్నట్లు సమాచారం.

ప్రస్తుతం చిత్రానికి సంబంధించిన స్క్రిప్ట్‌ పనులు వేగంగా జరుగుతున్నాయని తెలుస్తోంది. 2027 ఆరంభంలో ఈ సినిమాను లాంఛనంగా ప్రారంభించి, ఏప్రిల్‌–మే నెలల నుంచి రెగ్యులర్‌ చిత్రీకరణ చేపట్టనున్నట్లు సినీ వర్గాల్లో ప్రచారం జరుగుతోంది. దాదాపు నాలుగున్నర దశాబ్దాల తర్వాత రజనీకాంత్‌, కమల్‌హాసన్‌ కలిసి నటించనున్న చిత్రం కావడంతో దీనిపై ఇప్పటికే దేశవ్యాప్తంగా భారీ అంచనాలు నెలకొన్నాయి. ఈ చిత్రానికి అనిరుధ్‌ రవిచందర్‌ సంగీతం అందిస్తుండగా, రెడ్‌ జెయింట్‌ మూవీస్‌ సంస్థ నిర్మిస్తోంది.