కూటమి నేతలు, పోలీసులను రెచ్చగొట్టేలా జగన్‌ వ్యవహారం- చంద్రబాబు

పులివెందులలో వైకాపా అధినేత వైఎస్‌ జగన్‌మోహన్‌రెడ్డి విధ్వంసం సృష్టించేందుకు ప్రయత్నించారని ముఖ్యమంత్రి చంద్రబాబు నాయుడు ఆరోపించారు. కూటమి పార్టీల నేతలు, పోలీసులను రెచ్చగొట్టేలా జగన్‌ వ్యవహరించారని విమర్శించారు. ఇలాంటి పరిణామాల పట్ల అప్రమత్తంగా ఉండాలని, కూటమి నాయకులు, కార్యకర్తలు సంయమనం పాటించాలని సూచించారు. ఎన్నికల నిబంధనలను తప్పనిసరిగా పాటిస్తూ పోలింగ్‌ శాతం పెరిగేలా కృషి చేయాలని చెప్పారు. ఏవైనా అవాంఛనీయ సంఘటనలు చోటుచేసుకుంటే వెంటనే ఎన్నికల అధికారులు, పోలీసుల దృష్టికి తీసుకెళ్లాలని ఆదేశించారు. పురపాలక ఎన్నికల పోలింగ్‌ సరళిపై ఆదివారం కూటమి పార్టీల ముఖ్య నేతలు, కార్యకర్తలతో నిర్వహించిన టెలికాన్ఫరెన్స్‌లో చంద్రబాబు ఈ వ్యాఖ్యలు చేశారు.

రాష్ట్రవ్యాప్తంగా ఎన్నికలు ప్రశాంతంగా జరుగుతున్నాయని చంద్రబాబు తెలిపారు. గతంలో నిర్వహించిన స్థానిక సంస్థల ఎన్నికలతో పోలిస్తే ఈసారి ప్రజల్లో మంచి ఉత్సాహం కనిపిస్తోందని పేర్కొన్నారు. పలు పురపాలికల్లో ఓటర్లు పోలింగ్‌ కేంద్రాల వద్ద బారులు తీరుతున్నారని, కొన్ని ప్రాంతాల్లో మాత్రం తక్కువ పోలింగ్‌ నమోదైందని చెప్పారు. ఓటర్లందరూ తమ ఓటు హక్కును వినియోగించుకునేలా కూటమి శ్రేణులు చొరవ తీసుకోవాలని సూచించారు. ముఖ్యంగా పోలింగ్‌ కేంద్రాలకు వెళ్లలేని వృద్ధులు, దివ్యాంగులకు అవసరమైన సహకారం అందించాలని చంద్రబాబు దిశానిర్దేశం చేశారు.