కొనసాగుతున్న ఖైరతాబాద్‌ గణేశుడి శోభాయాత్ర.. భారీగా తరలివచ్చిన భక్తులు

ఖైరతాబాద్‌ మహాగణపతి శోభాయాత్ర కొనసాగుతోంది. ఎలాంటి అంతరాయం లేకుండా ముందుకు సాగుతున్న మహాగణపతిని దర్శించుకునేందుకు భారీ సంఖ్యలో భక్తులు తరలివచ్చారు. పరిసర భవనాల నుంచి భక్తులు గణేశుడిపై పూలు జల్లుతూ తమ భక్తిని చాటుకుంటున్నారు. భక్తులు శోభాయాత్రకు మరింత దగ్గరగా రాకుండా నిర్వాహకులు ప్రత్యేక చర్యలు తీసుకుంటున్నారు.

శోభాయాత్ర మార్గాల్లో పోలీసులు డ్రోన్ల ద్వారా పరిస్థితిని ఎప్పటికప్పుడు పర్యవేక్షిస్తున్నారు. ట్రాఫిక్‌ రద్దీని నియంత్రించేందుకు ఆయా మార్గాల్లో వాహనాల మళ్లింపులు చేపట్టారు. రాజ్‌దూత్‌ భవన్‌, టెలిఫోన్‌ భవన్‌ మీదుగా ఖైరతాబాద్‌ మహాగణపతి ట్యాంక్‌బండ్‌ వైపు సాగనుంది. నిర్ణయించిన ప్రదేశంలో నిమజ్జన ప్రక్రియను మధ్యాహ్నం 2 గంటలలోపు పూర్తి చేసేలా అధికారులు చర్యలు చేపడుతున్నారు.