‘ఖేలో ఇండియా’కు రూ.120 కోట్లతో ఏర్పాట్లు.. సీఎస్ సంజయ్ జాజు వెల్లడి

తెలంగాణలో ఖేలో ఇండియా యూత్ గేమ్స్-2026 నిర్వహణకు రాష్ట్ర ప్రభుత్వం భారీ ఏర్పాట్లు చేస్తోంది. డిసెంబర్ 11 నుంచి 22వ తేదీ వరకు జరగనున్న ఈ క్రీడా పోటీల కోసం సుమారు రూ.120 కోట్లతో మౌలిక సదుపాయాలు, ఇతర సౌకర్యాలు కల్పిస్తున్నట్లు ప్రభుత్వ ప్రధాన కార్యదర్శి సంజయ్ జాజు వెల్లడించారు. పోటీల్లో పాల్గొనే క్రీడాకారులకు ఎలాంటి ఇబ్బందులు కలగకుండా అన్ని ఏర్పాట్లు చేస్తున్నట్లు తెలిపారు.

కేంద్ర క్రీడా శాఖ కార్యదర్శి హరిరంజన్ రావు, రాష్ట్ర ప్రభుత్వ ప్రధాన కార్యదర్శి సంజయ్ జాజు, రాష్ట్ర క్రీడా శాఖ అధికారులతో వీడియో కాన్ఫరెన్స్ నిర్వహించి ఏర్పాట్లను సమీక్షించారు. దేశంలోని వివిధ ప్రాంతాల నుంచి సుమారు 7 వేల మంది క్రీడాకారులు ఈ పోటీల్లో పాల్గొంటారని సంజయ్ జాజు వివరించారు. హైదరాబాద్‌తో పాటు హనుమకొండ, నిజామాబాద్, కరీంనగర్, ఖమ్మం, మహబూబ్‌నగర్ నగరాల్లో పోటీలు నిర్వహించనున్నారు.