సూర్యాపేటలో భారీ కేంద్రీకృత వంటశాల..

సూర్యాపేట జిల్లా మునగాల మండలం సయ్యద్‌ముజావర్‌పేటలో రోజుకు దాదాపు 60 వేల మంది విద్యార్థులకు పోషకాహారం అందించే భారీ కేంద్రీకృత వంటశాల నిర్మాణం జరుగుతోంది. ఈ సదుపాయాన్ని 100 రోజుల్లో అందుబాటులోకి తీసుకురావడానికి అధికారులు చర్యలు చేపట్టారు. సింగరేణి కాలరీస్‌ కంపెనీ లిమిటెడ్‌ (ఎస్‌సీసీఎల్‌) తన సామాజిక బాధ్యత కార్యక్రమం కింద రూ.9.6 కోట్లను అందించింది. హరేకృష్ణ మూవ్‌మెంట్‌ చారిటబుల్‌ ఫౌండేషన్‌ సహకారంతో చేపడుతున్న ఈ ప్రాజెక్టు ద్వారా సుమారు 1,029 ప్రభుత్వ పాఠశాలలు, జూనియర్‌ కళాశాలలకు భోజనం అందించనున్నారు. వంట, నాణ్యతా నియంత్రణ, ప్యాకింగ్‌, పంపిణీ ప్రక్రియలను ఒకే వ్యవస్థలో నిర్వహించేలా వంటశాలను రూపొందిస్తున్నారు.

ఈ ప్రాజెక్టును నీటిపారుదల, ఆహారం, పౌర సరఫరాల శాఖ మంత్రి ఎన్‌. ఉత్తమ్‌ కుమార్‌ రెడ్డి పర్యవేక్షిస్తున్నారు. సూర్యాపేట జిల్లా కలెక్టర్‌ తేజస్‌ నంద్‌లాల్‌ పవార్‌ 100 రోజుల్లో వంటశాలను ప్రారంభించేందుకు చర్యలు కొనసాగుతున్నట్లు తెలిపారు. ఈ వంటశాల ద్వారా నల్గొండ జిల్లాలోని నకిరేకల్‌, శాలిగౌరారం, కేతేపల్లి, వేములపల్లి మండలాల్లోని 131 ప్రభుత్వ విద్యాసంస్థల్లో చదువుతున్న 7,972 మంది విద్యార్థులకు కూడా భోజనం అందనుంది. పోషకాహార లోపాన్ని తగ్గించడం, విద్యార్థుల ఆరోగ్యం, హాజరు, ఏకాగ్రతను మెరుగుపరచడం ఈ కార్యక్రమం లక్ష్యంగా ఉంది. మిల్లెట్‌ ఆధారిత వంటకాలను కూడా మెనూలో చేర్చనున్నారు. ఎస్‌సీసీఎల్‌ అందించిన రూ.9.6 కోట్ల నిధులకు మంత్రి ఉత్తమ్‌ కుమార్‌ రెడ్డి కృతజ్ఞతలు తెలిపారు.