మెటా నుంచి కొత్త కోడింగ్ యాప్

టెక్ దిగ్గజం మెటా, కృత్రిమ మేధ (ఏఐ) ఆధారిత ఆటోమేటెడ్ కోడింగ్ టూల్స్ రేసులోకి అధికారికంగా ప్రవేశించింది. ఓపెన్‌ఏఐ, యాంత్రోపిక్ వంటి సంస్థల నుంచి తీవ్రమైన పోటీని ఎదుర్కొంటున్న నేపథ్యంలో ఏఐ డెవలపర్ల కోసం 'మ్యూజ్ కోడ్' పేరుతో ఒక శక్తిమంతమైన అప్లికేషన్‌ను బుధవారం ప్రకటించింది. ఆదాయం, కస్టమర్ల పరంగా ఏఐ రంగంలో పట్టు సాధించేందుకు మెటా వేగంగా అడుగులు వేస్తోంది.

'మ్యూజ్ కోడ్' అనేది ఒక ఏజెటిక్ కోడింగ్ టూల్ అని, ఇది మానవ ప్రమేయం లేదా పర్యవేక్షణ తక్కువగా అవసరమయ్యే సంక్లిష్టమైన సాఫ్ట్‌వేర్ ఇంజనీరింగ్ పనులను చేయగలదని మెటా ఒక బ్లాగ్ పోస్ట్‌లో వివరించింది. కోడ్‌ను ప్లాన్ చేయడం, రాయడం, సరిచూడటం వంటి పనులను ఇది స్వయంగా నిర్వహించగలదు. ప్రస్తుతం ఈ యాప్‌ను బీటా వెర్షన్‌లో (ప్రివ్యూ మోడ్) అందుబాటులోకి తెచ్చారు. దీంతో పాటు తమ ఫ్లాగ్‌షిప్ మోడల్ అయిన 'స్పార్క్'కు అప్‌డేట్‌గా 'స్పార్క్ 1.2'ను కూడా విడుదల చేసింది. ఈ కొత్త మోడల్ ప్రత్యేకంగా కోడింగ్‌పై దృష్టి సారిస్తుందని, ఇది మ్యూజ్ కోడ్ ద్వారా అందుబాటులో ఉంటుందని సంస్థ తెలిపింది.

ఏఐ మోడళ్ల సామర్థ్యం పెరిగే కొద్దీ భద్రతాపరమైన ఆందోళనలు కూడా పెరుగుతున్నాయి. ఇటీవల టెస్టింగ్ సమయంలో ఓపెన్‌ఏఐ, యాంత్రోపిక్ అభివృద్ధి చేసిన మోడళ్లు స్వయంప్రతిపత్తితో సైబర్ దాడులకు పాల్పడినట్లు వార్తలు వచ్చాయి. ఇదే తరహాలో మెటాకు చెందిన 'స్పార్క్ 1.1' మోడల్‌తో కూడా ఒక సంఘటన జరిగినట్లు కథనాలు వెలువడ్డాయి. దీనిపై మెటా స్పందిస్తూ, థర్డ్-పార్టీ టెస్టింగ్ భాగస్వామి వద్ద 'మిస్‌కాన్ఫిగరేషన్' కారణంగా ఈ పొరపాటు జరిగిందని తెలిపింది. ఈ ఘటనపై దర్యాప్తు చేస్తున్నామని, పూర్తి వాస్తవాలు తెలిశాక నివేదిక విడుదల చేస్తామని వివరించింది.