బెంగళూరులో దారుణం.. భార్య, ఏడేళ్ల చిన్నారి సహా ఏడుగురిని హత్య చేసిన క్యాబ్ డ్రైవర్!

కర్ణాటక రాజధాని బెంగళూరులో తీవ్ర కలకలం రేపిన సామూహిక హత్యల ఘటన వెలుగులోకి వచ్చింది. రాజాజీనగర్‌లో ఓ క్యాబ్ డ్రైవర్‌ తన భార్యతో పాటు ఆమె కుటుంబానికి చెందిన మరో ఆరుగురిని హత్య చేసినట్లు పోలీసులు వెల్లడించారు. నిందితుడిని ఇందు శేఖర్‌గా గుర్తించారు. 20 ఏళ్ల క్రితం సునీతను వివాహం చేసుకున్న శేఖర్.. తమ వైవాహిక జీవితంలో భార్య తరఫు బంధువులు జోక్యం చేసుకుంటున్నారనే ఆగ్రహంతో కొంతకాలంగా వారితో విభేదాలు పెట్టుకున్నట్లు ప్రాథమిక విచారణలో తేలింది. ఈ క్రమంలో అక్టోబర్ 17 నుంచి ఒక్కొక్కరిని వివిధ కారణాలతో ఇంటికి పిలిపించి, రోకలితో దాడి చేసి హత్య చేసినట్లు పోలీసులు అనుమానిస్తున్నారు. అనంతరం మృతదేహాలను నగరంలోని వేర్వేరు ప్రాంతాల్లో పడేసినట్లు గుర్తించారు.

ఈ ఘటనలో శేఖర్ భార్య సునీత, అత్త రూపవతి, బావమరుదులు శివకుమార్, శంకర్‌, బంధువులు దివ్య, నళినితో పాటు ఏడేళ్ల చిన్నారి ప్రాణాలు కోల్పోయారు. ఒక్కొక్కరిని ఒక్కో కారణంతో ఇంటికి పిలిచి హత్య చేసినట్లు పోలీసులు తెలిపారు. సునీతను చంపిన తర్వాత ఆమె మృతదేహాన్ని మాయం చేసి, స్నేహితురాలితో కలిసి విహారయాత్రకు వెళ్లిందని బంధువులు, ఇరుగుపొరుగు వారిని నమ్మించినట్లు వెల్లడించారు. ఆమె ఫోన్‌ను కూడా స్విచ్ఛాఫ్‌ చేశాడు. నళిని కనిపించడం లేదంటూ ఆమె తల్లి పోలీసులకు ఫిర్యాదు చేయడంతో విచారణ ప్రారంభమైంది. ఈ క్రమంలో శేఖర్‌ను ప్రశ్నించగా, తానే హత్యలు చేసినట్లు అంగీకరించినట్లు పోలీసులు తెలిపారు. ఈ నేరాలకు అతడి కుమార్తె కూడా సహకరించి ఉండవచ్చని పోలీసులు అనుమానిస్తున్నారు.