ప్రపంచ షూటింగ్‌ ఛాంపియన్‌షిప్‌లో జైపాల్‌ మాల్వియాకు రజతం..

ప్రపంచ షూటింగ్‌ ఛాంపియన్‌షిప్‌లో భారత్‌కు వ్యక్తిగత విభాగంలో తొలి పతకం లభించింది. గురువారం జరిగిన పురుషుల 10 మీటర్ల ఎయిర్‌ పిస్టల్‌ ఈవెంట్‌లో జైపాల్‌ మాల్వియా రజత పతకంతో మెరిశాడు. క్వాలిఫికేషన్‌ రౌండ్‌లో 585 పాయింట్లతో మూడో స్థానంలో నిలిచి ఫైనల్‌కు అర్హత సాధించిన అతడు.. పతక పోరులోనూ అద్భుత ప్రదర్శన చేశాడు. మొత్తం 242.2 పాయింట్లతో రెండో స్థానాన్ని దక్కించుకున్నాడు. చైనాకు చెందిన హు కయ్‌ 243.9 పాయింట్లతో స్వర్ణం గెలవగా, చెకియాకు చెందిన జిండ్రిచ్‌ డుబోవీ 220.9 పాయింట్లతో కాంస్యం సాధించాడు. ఈ రజతంతో జైపాల్‌ 2028 లాస్‌ఏంజెలెస్‌ ఒలింపిక్స్‌కు భారత్‌కు కోటా స్థానాన్ని కూడా అందించాడు.

మరోవైపు మహిళల 10 మీటర్ల ఎయిర్‌ పిస్టల్‌ టీమ్‌ ఈవెంట్‌లో మను భాకర్‌, సంయమ్‌, సురుచి జట్టు రజత పతకాన్ని గెలుచుకుంది. క్వాలిఫికేషన్‌లో మను 583, సురుచి 580, సంయమ్‌ 575 పాయింట్లు సాధించడంతో భారత్‌ 1,738 పాయింట్లతో రెండో స్థానంలో నిలిచింది. చైనా 1,745 పాయింట్లతో స్వర్ణం, దక్షిణ కొరియా 1,729 పాయింట్లతో కాంస్యం సాధించాయి. వ్యక్తిగత విభాగంలో ఫైనల్‌కు చేరిన మను 179.9 పాయింట్లతో ఐదో స్థానంలో, సురుచి 158.3 పాయింట్లతో ఆరో స్థానంలో నిలిచారు. చైనాకు చెందిన జియాంగ్‌ (242.4), యావో (242.1) స్వర్ణ, రజత పతకాలు సాధించగా.. హంగరీకి చెందిన మజోర్‌ 222.1 పాయింట్లతో కాంస్యం గెలిచింది.