కేబీఆర్ రోడ్డు విస్తరణ కోసం నందమూరి బాలకృష్ణ త్యాగం..

హైదరాబాద్‌లో ట్రాఫిక్ సమస్యలను తగ్గించే లక్ష్యంతో చేపడుతున్న కాసు బ్రహ్మానందరెడ్డి (కేబీఆర్) పార్క్ చుట్టూ రహదారుల విస్తరణ పనులకు సినీ నటుడు, హిందూపురం ఎమ్మెల్యే నందమూరి బాలకృష్ణ తన వంతు సహకారం అందించేందుకు ముందుకొచ్చారు. తన ఇంటికి చెందిన 862.77 చదరపు గజాల స్థలాన్ని ప్రభుత్వానికి అప్పగించేందుకు అంగీకరించారు. కేబీఆర్ పార్క్ చుట్టూ ప్రయోగాత్మకంగా అమలు చేసిన వన్‌వే ట్రాఫిక్ విధానం విజయవంతం కావడంతో, దానిని శాశ్వతం చేసేందుకు ప్రభుత్వం చర్యలు చేపట్టింది. ఇందులో భాగంగా రహదారుల విస్తరణతో పాటు వాహనాల రాకపోకలకు అడ్డంకిగా ఉన్న ప్రాంతాలను అభివృద్ధి చేయనున్నారు. ఈ పనులు పూర్తయితే బంజారాహిల్స్, జూబ్లీహిల్స్ నుంచి దుర్గం చెరువు కేబుల్ బ్రిడ్జి, నాలెడ్జ్ సిటీ వైపు వెళ్లే ప్రయాణికులకు సమయం ఆదా కానుంది.

బాలకృష్ణ తండ్రి, దివంగత మాజీ ముఖ్యమంత్రి ఎన్టీ రామారావు 1982లో ఈ ఇంటిని నిర్మించి ఆయనకు ఇచ్చారు. కుటుంబానికి ఎంతో అనుబంధం ఉన్న ఈ ఇంటిలో కొంత భాగం రహదారి విస్తరణలో తొలగించాల్సి రావడంతో బాలకృష్ణ మరో ప్రాంతానికి మారనున్నారు. ఈ పనుల కోసం శబ్దాలయ స్టూడియో 608 చదరపు గజాలు, భవ్య కన్‌స్ట్రక్షన్స్ 341.33 చదరపు గజాల స్థలాన్ని కూడా అప్పగించాయి. ఈ సంస్థలు నగదు పరిహారానికి బదులుగా బదిలీ అభివృద్ధి హక్కుల విధానాన్ని ఎంచుకున్నట్లు సమాచారం. మరోవైపు, ముఫఖంజా కాలేజీ నుంచి జూబ్లీహిల్స్ చెక్‌పోస్ట్ వరకు రూ.1,090 కోట్లతో 4.3 కిలోమీటర్ల స్టీల్ ఫ్లైఓవర్ నిర్మాణం కూడా కొనసాగుతోంది. ఈ ప్రాజెక్టులు పూర్తయితే కేబీఆర్ పార్క్ పరిసరాల్లో ట్రాఫిక్ రద్దీ తగ్గించేందుకు దోహదపడనున్నాయి.