పోలీసుల తీరుపై రాహుల్ గాంధీ ఆగ్రహం

దిల్లీలో జరిగిన ఇండియా కూటమి ర్యాలీలో ఉద్రిక్తత నెలకొంది. రాజ్ ఘాట్‌కు బయలుదేరిన ప్రతిపక్ష ఎంపీల బస్సును పోలీసులు అడ్డుకున్నారు. నీట్ పేపర్ లీక్ వివాదంలో ప్రభావితమైన విద్యార్థులకు నివాళులు అర్పించేందుకు ఎంపీలు వెళ్తుండగా ఈ ఘటన చోటుచేసుకుంది. మధ్యలోనే బస్సు డ్రైవర్ వాహనం వదిలి వెళ్లిపోవడం పరిస్థితిని మరింత ఉద్రిక్తంగా మార్చింది. పోలీసుల తీరుపై రాహుల్ గాంధీ తీవ్ర ఆగ్రహం వ్యక్తం చేశారు.

ఇండియా గేట్, రాజ్ ఘాట్‌లకు వెళ్లేందుకు అనుమతి ఇవ్వలేదని ఆయన ఆరోపించారు. విద్యార్థుల నిరసనలకు మద్దతుగా ప్రతిపక్ష ఎంపీలు రోడ్లపైకి దిగుతారని తెలిపారు. లాఠీచార్జ్‌లో గాయపడిన విద్యార్థులకు అండగా ఉంటామని, నీట్ వివాదంలో ప్రాణాలు కోల్పోయిన వారికి రాజ్ ఘాట్‌లో నివాళులు అర్పిస్తామని పేర్కొన్నారు. విద్యార్థుల డిమాండ్లకు ఇండియా కూటమి సంపూర్ణ మద్దతు ప్రకటించింది.