తన కలల ప్రయాణంపై సమంత ఎమోషనల్ పోస్ట్...

టాలీవుడ్ స్టార్ హీరోయిన్ సమంత రూత్ ప్రభు మరోసారి తన సోషల్ మీడియా పోస్ట్‌తో అభిమానుల దృష్టిని ఆకర్షించారు. తన కలలు, లక్ష్యాలు, వాటిని సాధించేందుకు సాగించిన ప్రయాణం గురించి ఆమె స్ఫూర్తిదాయకమైన విషయాలను పంచుకున్నారు. తనకుతానే విధించుకున్న 1,000 రోజుల ప్రతిజ్ఞలో 484వ రోజుకు చేరుకున్నట్లు తెలిపిన సమంత.. ఇంకా జరగని జీవితాన్ని ముందుగానే ఊహించుకుని రాసుకోవడంలో ఎంతో శక్తి ఉందని పేర్కొన్నారు. తన కోరికల జాబితాలో ఒకప్పుడు తనకే అసంబద్ధంగా అనిపించిన కొన్ని పెద్ద లక్ష్యాలు ఉండేవని, అయితే ఇప్పుడు వాటిలో ఎన్నో నిజ జీవితంలో భాగమయ్యాయని వెల్లడించారు.

కలలకు కూడా ఒక గడువు పెట్టుకోవాలని సమంత అభిమానులకు సూచించారు. చుట్టూ ఉన్నవారి అనవసరమైన మాటలను పట్టించుకోకుండా లక్ష్యంపై దృష్టి పెట్టాలని, ఉత్సాహం తగ్గిపోయినప్పటికీ ప్రయత్నాన్ని మాత్రం ఆపకూడదని అన్నారు. గతంలో తాను రాసుకున్న పేజీలను తిరిగి చదివినప్పుడు, ఏదో ఒకటి సాధించాలని బలంగా కోరుకున్నప్పటికీ అది సాధ్యమవుతుందో లేదో పూర్తిగా నమ్మకం లేని తన పాత రూపాన్ని కలుసుకున్నట్లుగా అనిపిస్తుందని చెప్పారు. ప్రస్తుతం ఆ లక్ష్యాలను సాధించిన అనుభూతి ఎంతో ప్రత్యేకంగా ఉందని పేర్కొన్నారు. ‘పెద్దగా కలలు కనండి.. నమ్మండి.. నమ్ముతూనే ఉండండి’ అంటూ ఆమె ఇచ్చిన సందేశం వైరల్‌గా మారింది.