ఏపీలో వరుస అగ్నిప్రమాదాలు.. ఘటనలపై సీఎం చంద్రబాబు సమీక్ష!

ఆంధ్రప్రదేశ్‌లో దీపావళి వేళ వరుసగా చోటుచేసుకున్న అగ్నిప్రమాదాలపై ముఖ్యమంత్రి చంద్రబాబు నాయుడు విచారం వ్యక్తం చేశారు. రాష్ట్రంలోని పలు ప్రాంతాల్లో జరిగిన అగ్నిప్రమాదాల వివరాలను అధికారులను అడిగి తెలుసుకున్నారు. రాజాంలో ఆటోమొబైల్ షోరూమ్ అగ్నికి ఆహుతి కాగా, గన్నవరంలో ఫర్నిచర్ దుకాణంలో భారీ అగ్నిప్రమాదం చోటుచేసుకుంది. బాణసంచా నుంచి వెలువడిన నిప్పురవ్వల కారణంగా గన్నవరంలో ఈ ప్రమాదం జరిగినట్లు ప్రాథమిక సమాచారం.

అదేవిధంగా తిరువూరులో షార్ట్ సర్క్యూట్ కారణంగా ఓ దుకాణంలో అగ్నిప్రమాదం సంభవించింది. ఈ మూడు ఘటనలపై సీఎం చంద్రబాబు అధికారులతో మాట్లాడి వివరాలు తెలుసుకున్నారు. దీపావళి సమయంలో వరుసగా అగ్నిప్రమాదాలు చోటుచేసుకోవడంపై ఆయన ఆందోళన వ్యక్తం చేశారు. ప్రమాదాలకు సంబంధించిన పూర్తి వివరాలను అధికారులను అడిగి తెలుసుకున్నారు.