శైలపుత్రి అలంకారంలో భక్తులకు దర్శనమిచ్చిన శ్రీశైల భ్రమరాంబ దేవి

శ్రీశైలం మహాక్షేత్రంలో దసరా మహోత్సవాలు వైభవంగా ప్రారంభమయ్యాయి. ఉత్సవాల్లో భాగంగా శ్రీ భ్రమరాంబ దేవికి ప్రత్యేక పూజలు, విశేష కుంకుమార్చనలు నిర్వహించారు. నవదుర్గ అలంకారాల్లో భాగంగా సాయంత్రం అమ్మవారి ఉత్సవమూర్తిని శైలపుత్రి రూపంలో అలంకరించి భక్తులకు దర్శనం కల్పించారు. అమ్మవారి దివ్య దర్శనం కోసం వచ్చిన భక్తులతో ఆలయ పరిసరాలు ఆధ్యాత్మిక శోభను సంతరించుకున్నాయి.

వాహనసేవలో భాగంగా స్వామి, అమ్మవార్ల ఉత్సవమూర్తులను అక్కమహాదేవి అలంకార మండపంలో బృంగి వాహనంపై అధిష్ఠింపజేసి ప్రత్యేక పూజలు నిర్వహించారు. అనంతరం నందీశ్వరుడి వెంట మేళతాళాల నడుమ శ్రీశైల క్షేత్ర ప్రధాన వీధుల్లో గ్రామోత్సవం కన్నులపండువగా సాగింది. ప్రత్యేక పుష్పాలంకరణలు, దేవస్థానం ఆధ్వర్యంలో నిర్వహించిన సాంస్కృతిక కార్యక్రమాలు భక్తులను ఆకట్టుకున్నాయి. దసరా ఉత్సవాల సందర్భంగా ఆలయంలో భక్తిభావ వాతావరణం నెలకొంది.