పెండింగ్‌ చలానాలపై సుప్రీంకోర్టు కీలక సూచనలు..

పెండింగ్‌లో ఉన్న ట్రాఫిక్‌ చలానాల వసూళ్లను కఠినతరం చేసే మార్గాలను పరిశీలించాలని సుప్రీంకోర్టు సూచించింది. ఎలక్ట్రానిక్‌ ఎన్‌ఫోర్స్‌మెంట్‌ ద్వారా జారీ చేసిన చలానాల్లో సుమారు రూ.45,000 కోట్ల విలువైనవి ఉండగా, అందులో సుమారు రూ.25,000 కోట్లు మాత్రమే వసూలైనట్లు కోర్టుకు వివరించారు. మిగిలిన చలానాల వసూళ్లకు మరింత సమర్థవంతమైన చర్యలు అవసరమని కోర్టు సూచించింది.

పెండింగ్‌ చలానాలను విద్యుత్‌ బిల్లులతో జత చేసి వసూలు చేసే మార్గాన్ని పరిశీలించాలని, చలానాలు చెల్లించని వాహనాలకు ఆన్‌లైన్‌ రవాణా సేవలను పరిమితం చేసే అంశాన్ని పరిశీలించాలని సుప్రీంకోర్టు సూచించింది. అలాగే వాహన యాజమాన్య బదిలీ, ఆర్‌సీకి సంబంధించిన సేవలపై ఆంక్షలు, పదేపదే ట్రాఫిక్‌ నిబంధనలు ఉల్లంఘించే వారిపై డ్రైవింగ్‌ లైసెన్స్‌ చర్యలు, పెండింగ్‌ చలానాలు ఉన్న వాహనాలను గుర్తించి వసూళ్లను కఠినతరం చేసే మార్గాలపైనా పరిశీలన జరపాలని సూచించింది. అయితే విద్యుత్‌ బిల్లులకు చలానాలను జత చేయడం ప్రస్తుతం సుప్రీంకోర్టు సూచించిన లేదా పరిశీలించిన విధానం మాత్రమే; దేశవ్యాప్తంగా ఇప్పటికే అమల్లోకి వచ్చిన కొత్త నిబంధన కాదు.