పారాచూట్ విమానం కుప్పకూలి ఘోర విషాదం

ఫ్రాన్స్‌లో ఘోర విమాన ప్రమాదం చోటు చేసుకుంది. టాంబ్లైన్ నగర సమీపంలో పారాచూట్ శిక్షణ సంస్థకు చెందిన పౌర విమానం ఆదివారం కుప్పకూలడంతో 11 మంది ప్రాణాలు కోల్పోయారు. పైలట్‌తో పాటు ప్రయాణికులు అక్కడికక్కడే మరణించినట్లు అధికారులు తెలిపారు. సహాయక బృందాలు ఘటన స్థలానికి చేరుకుని మృతదేహాల వెలికితీత చేపట్టాయి.

స్థానిక మీడియా ప్రకారం స్కైడైవింగ్ ట్రిప్ కోసం వెళ్తున్న సమయంలో ఈ ప్రమాదం జరిగింది. పారాచూట్ స్కూల్‌కు చెందిన ఈ విమానంలో ఐదుగురు విద్యార్థులు, ఐదుగురు శిక్షకులు ఉన్నట్లు సమాచారం. ప్రమాదానికి గల కారణాలు ఇంకా తెలియాల్సి ఉండగా, దర్యాప్తు ప్రారంభించనున్నట్లు అధికారులు వెల్లడించారు.