శిక్షణతోనే సమర్థ పోలీస్‌ నాయకత్వం -డీజీపీ సీవీ ఆనంద్

పోలీస్‌ అధికారుల కెరీర్‌కు శిక్షణే పునాది అని తెలంగాణ డీజీపీ సీ.వీ. ఆనంద్‌ అన్నారు. సమర్థవంతమైన పోలీస్‌ అధికారులుగా ఎదగాలంటే క్రమశిక్షణ, నిబద్ధత, నాయకత్వ లక్షణాలతో పాటు నైతిక విలువలను అలవర్చుకోవాలని సూచించారు. ఆర్‌బీవీఆర్‌ఆర్‌ తెలంగాణ పోలీస్‌ అకాడమీలో శిక్షణ పొందుతున్న 112 మంది ప్రొబేషనరీ డీఎస్పీలతో బుధవారం నిర్వహించిన ముఖాముఖిలో పోలీస్‌ నాయకత్వం, బాధ్యతలు, నైతికత, ప్రజలతో వ్యవహరించే తీరు తదితర అంశాలపై ఆయన మాట్లాడారు.

పదవిలో ఉండటం మాత్రమే నాయకత్వానికి సరిపోదని, ధైర్యం, స్పష్టమైన దార్శనికత, సమగ్రత, బృంద స్ఫూర్తి, నిష్పక్షపాత వైఖరి, సమర్థమైన కమ్యూనికేషన్‌, సాంకేతిక పరిజ్ఞానం, సృజనాత్మకత, వినయం వంటి లక్షణాలు అవసరమని డీజీపీ వివరించారు. చట్ట పరిజ్ఞానంతో పాటు దర్యాప్తు నైపుణ్యం, మానవీయ దృక్పథం, శారీరక దృఢత్వం, సాంకేతిక అవగాహనను పెంపొందించుకోవాలని సూచించారు. ప్రజలకు భద్రత కల్పించడం, సకాలంలో న్యాయం అందేలా చూడటమే పోలీసింగ్‌ అంతిమ లక్ష్యమని పేర్కొన్నారు.