చర్చలు విఫలమైతే అమెరికా కఠిన చర్యలు: ట్రంప్

ఇరాన్ అణు కార్యక్రమానికి సంబంధించి దౌత్యపరమైన పరిష్కారం త్వరలో లభించకుంటే అమెరికా మరింత కఠిన వైఖరి తీసుకుంటుందని అధ్యక్షుడు డొనాల్డ్ ట్రంప్ మరోసారి హెచ్చరించారు. ఇరాన్ చర్చల్లో తెలివిగా వ్యవహరించాల్సిన అవసరం ఉందని ఆయన పేర్కొన్నారు. ‘ట్రూత్ సోషల్’లో రైఫిల్ పట్టుకున్న ఫోటోను పోస్ట్ చేసిన ట్రంప్, ఇక మీదట తాను అంత మంచివాడిగా ఉండనని వ్యాఖ్యానించారు.

ఇరాన్ చర్చలను సరిగా నిర్వహించలేకపోతోందని, అణు ఒప్పందం ఎలా చేసుకోవాలో వారికి తెలియడం లేదని ఆయన అన్నారు. పశ్చిమాసియాలో ఉద్రిక్తతలు పెరుగుతున్న నేపథ్యంలో ఈ వ్యాఖ్యలు ప్రాధాన్యం సంతరించుకున్నాయి. అమెరికా ప్రతిపాదనలను తిరస్కరిస్తే మరింత దూకుడుగా వ్యవహరిస్తామని కూడా ఆయన హెచ్చరించారు.