ట్రంప్‌కు మధ్యంతర ఎన్నికల్లో ఎదురుదెబ్బ.. ఇరాన్ యుద్ధంపై అమెరికా ప్రజల ఆగ్రహం!

అమెరికా మధ్యంతర ఎన్నికల ఫలితాలు ఆ దేశ కాంగ్రెస్‌లో రాజకీయ సమీకరణాలను పూర్తిగా మార్చేశాయి. ప్రతిపక్ష డెమోక్రాట్లు ప్రతినిధుల సభ (హౌస్ ఆఫ్ రిప్రజెంటేటివ్స్), సెనేట్ రెండింటిలోనూ మెజారిటీ సాధించడంతో అధ్యక్షుడు డొనాల్డ్ ట్రంప్ రాజకీయంగా బలహీనపడ్డారు. ఉభయ సభల్లో రిపబ్లికన్ల ఆధిపత్యానికి తెరపడింది. విదేశాల్లో దుందుడుకు సైనిక చర్యలకు పాల్పడితే స్వదేశంలో రాజకీయంగా భారీ మూల్యం చెల్లించుకోవాల్సి వస్తుందనే సందేశాన్ని ఓటర్లు ఇచ్చారు. ముఖ్యంగా పెరిగిన జీవన వ్యయం, ఇంధన ధరలు ఎన్నికల ఫలితాలపై తీవ్ర ప్రభావం చూపాయి. ఈ ఏడాది ఫిబ్రవరి చివర్లో ప్రారంభమైన ఇరాన్ యుద్ధం కారణంగా పెట్రోల్, డీజిల్ ధరలు పెరిగి సామాన్య అమెరికన్లపై అదనపు భారం పడింది. సగటు కుటుంబంపై సుమారు 1,230 డాలర్ల అదనపు వ్యయం పడినట్లు అంచనాలు వెల్లడించాయి. ఇంధన ధరల పెరుగుదల తమ పార్టీ ఎన్నికల ఫలితాలను ప్రభావితం చేసిందని ట్రంప్ అంగీకరించినప్పటికీ, యుద్ధం వ్యూహాత్మకంగా అవసరమని సమర్థించుకున్నారు.

కాంగ్రెస్‌లో డెమోక్రాట్ల ఆధిపత్యం పెరగడంతో ట్రంప్ ప్రభుత్వం తీసుకునే కీలక నిర్ణయాలపై ఇకపై మరింత నిఘా ఉండనుంది. ప్రభుత్వ ప్రతిపాదిత చట్టాలను అడ్డుకోవడంతో పాటు, పార్లమెంటరీ కమిటీల ద్వారా ప్రభుత్వ నిర్ణయాలపై విచారణలు జరిపే అవకాశం ప్రతిపక్షానికి ఉంటుంది. ఫెడరల్ ప్రభుత్వ వ్యయాలపై కాంగ్రెస్‌కు ఉన్న నియంత్రణతో పాటు ఉన్నతాధికారులు, న్యాయమూర్తుల నియామకాల విషయంలోనూ సెనేట్ కీలక పాత్ర పోషించనుంది. మరోవైపు ఇరాన్ యుద్ధం, గల్ఫ్ ప్రాంతంలో చమురు, ఎల్‌ఎన్‌జీ సరఫరాలపై ఏర్పడిన అంతరాయాలు అంతర్జాతీయ ఆర్థిక వ్యవస్థను ప్రభావితం చేస్తున్నాయి. ఇరాన్‌పై అమెరికా నుంచి మరింత మద్దతు కోరుతున్న ఇజ్రాయెల్‌కు కూడా తాజా పరిణామాలు రాజకీయంగా సవాలుగా మారవచ్చు. యుద్ధ వ్యయం, సైనిక సాయం, పౌరులపై పడుతున్న ఆర్థిక భారం వంటి అంశాలపై ట్రంప్ ప్రభుత్వాన్ని కాంగ్రెస్ ప్రశ్నించే అవకాశం ఉంది. ఈ పరిణామాల ప్రభావం భారత్‌పైనా కనిపిస్తోంది. ఇంధన ధరలు, రవాణా ఖర్చులు, ద్రవ్యోల్బణం పెరగడంతో పాటు ప్రపంచ ఆర్థిక వృద్ధి మందగించే ప్రమాదం ఉంది. 2025లో 3.5 శాతంగా ఉన్న ప్రపంచ వృద్ధిరేటు 2026లో 3.1 శాతానికి తగ్గవచ్చని ఐఎంఎఫ్ అంచనా వేసింది. సైనిక శక్తి మాత్రమే రాజకీయ విజయాన్ని అందించలేదని, ప్రజల ఆర్థిక భద్రత, ఇంధన స్థిరత్వం, ప్రభుత్వ విధానాలకు ప్రజల మద్దతు కూడా అత్యంత కీలకమని ఈ ఎన్నికలు మరోసారి స్పష్టం చేశాయి.