ట్రంప్‌కు మరో చిక్కు.. అవినీతి సహా ఐదు అంశాలపై దర్యాప్తునకు డెమోక్రాట్ల సిద్ధం!

అమెరికా మధ్యంతర ఎన్నికల్లో డెమోక్రటిక్ పార్టీ ఘన విజయం సాధించడంతో అధ్యక్షుడు డొనాల్డ్ ట్రంప్‌కు రాజకీయంగా కొత్త సవాళ్లు ఎదురుకానున్నాయి. కాంగ్రెస్ ఉభయ సభల్లోనూ మెజారిటీ సాధించిన డెమోక్రాట్లు.. ట్రంప్, ఆయన కుటుంబ సభ్యులు, అనుయాయులపై వచ్చిన అవినీతి ఆరోపణలపై సమగ్ర దర్యాప్తునకు సిద్ధమవుతున్నారు. ట్రంప్ కుటుంబ వ్యాపారాలు, ఇమిగ్రేషన్ అండ్ కస్టమ్స్ ఎన్‌ఫోర్స్‌మెంట్ (ఐసీఈ) కార్యకలాపాలు, జెఫ్రీ ఎప్‌స్టీన్ ఫైళ్ల వ్యవహారం, ప్రభుత్వ సామర్థ్య విభాగం (డోజ్), ప్రభుత్వంలోని అవినీతి ఆరోపణలు ప్రధానంగా ఐదు అంశాలపై విచారణ జరపాలని భావిస్తున్నారు. ట్రంప్ అధికారంలోకి వచ్చిన తర్వాత ఆయన కుటుంబ ఆస్తులు పెరిగిన తీరుతోపాటు ఖనిజాల ఒప్పందాల్లో కుటుంబ సభ్యుల పాత్ర, వాషింగ్టన్‌లో రియల్ ఎస్టేట్ ప్రాజెక్టులు, క్రిప్టో లావాదేవీలపైనా దృష్టి సారించనున్నారు. శ్వేతసౌధంలో ట్రంప్ నిర్మిస్తున్న బాల్‌రూమ్ సహా ఇతర నిర్మాణాలపైనా విచారణ జరపాలని కొందరు డెమోక్రటిక్ సభ్యులు కోరుతున్నారు. మరోవైపు ప్రతినిధుల సభలో డెమోక్రటిక్ నేత హకీం జెఫ్రీస్.. ట్రంప్‌పై మూడోసారి అభిశంసన ప్రక్రియ చేపట్టే అంశాన్ని కూడా ప్రస్తావించారు.

ఎన్నికల్లో అవినీతి అంశం ఓటర్లపై గణనీయమైన ప్రభావం చూపింది. సుమారు లక్ష మందితో నిర్వహించిన సర్వేలో 50 శాతం మంది అవినీతినే ప్రధాన సమస్యగా పేర్కొన్నారు. ఇరాన్ యుద్ధాన్ని ట్రంప్ ప్రభుత్వం నిర్వహించిన తీరుపైనా డెమోక్రాట్లు విచారణ జరిపించే అవకాశం ఉంది. పౌరుల మరణాలు, మందుగుండు సామగ్రి కొరత, సైనిక వ్యయం, అమెరికా బలగాల సన్నద్ధత వంటి అంశాలు పరిశీలనకు వచ్చే అవకాశం ఉంది. డ్రగ్స్ అక్రమ రవాణాను అడ్డుకునే పేరుతో కరీబియన్ సముద్రంలో చేపట్టిన సైనిక దాడులపైనా విచారణ జరగవచ్చు. అయితే ట్రంప్‌ను అభిశంసన ద్వారా పదవి నుంచి తొలగించడం అంత సులభం కాదు. ప్రతినిధుల సభలో సాధారణ మెజారిటీతో అభిశంసన తీర్మానం ఆమోదం పొందినా.. సెనేట్‌లో దోషిగా నిర్ధారించి పదవి నుంచి తొలగించాలంటే మూడింట రెండొంతుల మెజారిటీ అవసరం. ఇదిలా ఉండగా, రిపబ్లికన్ల ఓటమిపై శ్వేతసౌధం ట్రంప్ ఫొటోతో 'నెవర్ సరెండర్' అనే సందేశాన్ని పోస్టు చేసింది. ఇరాన్‌తో ఎనిమిది నెలలుగా కొనసాగుతున్న యుద్ధం, దాని కారణంగా పెరిగిన ఇంధన ధరలు తమ పార్టీ ఓటమికి కారణమయ్యాయని ట్రంప్ అంగీకరించారు. అయినప్పటికీ ఇరాన్ అణ్వాయుధాన్ని పొందకుండా అడ్డుకోవడమే దీర్ఘకాలిక పరిష్కారమని, మళ్లీ అలాంటి పరిస్థితి ఎదురైనా ఇదే నిర్ణయం తీసుకుంటానని స్పష్టం చేశారు.