రష్యా చమురుపై మళ్లీ ఆంక్షలకు అమెరికా సిద్ధం

రష్యా చమురుపై అమెరికా మరో కీలక నిర్ణయం తీసుకునేందుకు సిద్ధమవుతోంది. పశ్చిమాసియాలో పెరుగుతున్న ఉద్రిక్తతల నేపథ్యంలో రష్యా చమురు కొనుగోలుకు ఇచ్చిన మినహాయింపులను ఎత్తివేసి మళ్లీ ఆంక్షలు విధించాలని యోచిస్తోంది. ఈ విషయాన్ని అమెరికా విదేశాంగ మంత్రి మార్కో రూబియో సెనెట్ విదేశీ సంబంధాల కమిటీ ముందు వెల్లడించారు. మినహాయింపులను వీలైనంత త్వరగా ముగించాలని భావిస్తున్నట్లు, రష్యా చమురుపై ఆంక్షలు విధించడం అమెరికా ప్రధాన లక్ష్యమని తెలిపారు.

అంతర్జాతీయ చమురు సరఫరా స్థిరత్వం కోసం తాత్కాలికంగా ఈ మినహాయింపులు ఇచ్చినట్లు ఆయన చెప్పారు. అయితే, ప్రస్తుతం మారుతున్న పరిస్థితులను బట్టి ట్రెజరీ శాఖ తుది నిర్ణయం తీసుకుంటుందని పేర్కొన్నారు. పశ్చిమాసియా సంక్షోభంతో ప్రపంచవ్యాప్తంగా ముడిచమురు ధరలు పెరగడంతో మార్చిలో మొదటిసారి ఈ మినహాయింపులు ఇచ్చి, తరువాత రెండుసార్లు పొడిగించారు. ప్రస్తుత గడువు ఈ నెల 17తో ముగియనుంది.