ఐడీబీఐ విక్రయ నిర్ణయంపై రాహుల్ అభ్యంతరం..

లాభాల్లోకి వచ్చిన ప్రభుత్వ రంగ ఐడీబీఐ బ్యాంకును ఎందుకు ప్రైవేటీకరిస్తున్నారంటూ కాంగ్రెస్ అగ్రనేత, లోక్‌సభ ప్రతిపక్ష నేత రాహుల్ గాంధీ కేంద్ర ప్రభుత్వాన్ని ప్రశ్నించారు. బ్యాంకు విక్రయాన్ని వ్యతిరేకిస్తున్న ఉద్యోగులకు మద్దతు ప్రకటించిన ఆయన.. ఏడేళ్ల క్రితం నష్టాల్లో ఉన్న ఐడీబీఐ బ్యాంకు, ఉద్యోగుల కృషితో తిరిగి లాభాల బాట పట్టిందని పేర్కొన్నారు. గత ఆర్థిక సంవత్సరం 2025–26లో బ్యాంకు రూ.9,513 కోట్ల నికర లాభాన్ని ఆర్జించిందని గుర్తుచేస్తూ, ఇంతటి లాభాలు సాధిస్తున్న బ్యాంకును విక్రయించాల్సిన అవసరం ఏమిటని ప్రశ్నించారు.

కెనడాకు చెందిన ఫెయిర్‌ఫాక్స్ ఫైనాన్షియల్ హోల్డింగ్స్‌కు ఐడీబీఐ బ్యాంకులో 60.72 శాతం వాటాను విక్రయించేందుకు కేంద్ర కేబినెట్ ఆర్థిక వ్యవహారాల కమిటీ ఆమోదం తెలిపింది. ఇందులో కేంద్ర ప్రభుత్వానికి చెందిన 30.48 శాతం, ఎల్‌ఐసీకి చెందిన 30.24 శాతం వాటాలు ఉన్నాయి. ఈ లావాదేవీ విలువ సుమారు రూ.52,878 కోట్లు. విక్రయం అనంతరం కేంద్రం, ఎల్‌ఐసీ కలిపి బ్యాంకులో 34 శాతం వాటాను కలిగి ఉంటాయి. ప్రైవేటీకరణ వల్ల ఉద్యోగుల సర్వీసు నిబంధనలు, రిజర్వేషన్లు, ఖాతాదారుల ప్రయోజనాలపై ప్రభావం పడే అవకాశం ఉందని రాహుల్ ఆందోళన వ్యక్తం చేశారు.