

అమెరికా వైమానిక దాడుల నుంచి తన క్షిపణి తయారీ కేంద్రాలు, సైనిక స్థావరాలను రక్షించుకునేందుకు ఇరాన్ అనుసరిస్తున్న వ్యూహాలపై ఆసక్తికర విషయాలు వెలుగులోకి వచ్చాయి. దేశంలోని కొన్ని ఆనకట్టలు, నీటి సరఫరా ప్రాజెక్టుల నిర్మాణం వెనుక సైనిక అవసరాలు కూడా ఉండొచ్చని నిపుణులు విశ్లేషిస్తున్నారు. జర్మనీలోని హాంబర్గ్ విశ్వవిద్యాలయానికి చెందిన శాస్త్రవేత్త డాక్టర్ నిమా షోక్రీ.. ఇరాన్లో నిర్మించిన 533 ఆనకట్టల భౌగోళిక పరిస్థితులను పరిశీలించినప్పుడు కొన్ని అసాధారణ అంశాలను గుర్తించినట్లు కథనాలు వెల్లడించాయి. ముఖ్యంగా, ఈ ఏడాది అమెరికా-ఇరాన్ మధ్య ఉద్రిక్తతలు, సైనిక దాడులు చోటుచేసుకున్న నేపథ్యంలో ఆయన రూపొందించిన మ్యాప్లను పరిశీలించగా.. కొన్ని ఆనకట్టలకు సమీపంలోనే అమెరికా వైమానిక దాడులు జరిగినట్లు గుర్తించినట్లు సమాచారం. ఈ నేపథ్యంలో ఆ ప్రాజెక్టులు కేవలం నీటి అవసరాల కోసమే కాకుండా, కీలక సైనిక కేంద్రాలకు అవసరమైన వనరులను అందించేందుకు నిర్మించి ఉండొచ్చనే అనుమానాలు వ్యక్తమవుతున్నాయి.
సాధారణంగా క్షిపణి తయారీ కేంద్రాలు, ఇతర సైనిక స్థావరాలకు నిరంతర నీరు, విద్యుత్తు సరఫరా అవసరం. ఇరాన్లోని కొన్ని ఆనకట్టలు ఈ అవసరాలను తీర్చేందుకు ఉపయోగపడేలా నిర్మించి ఉండొచ్చని విశ్లేషకులు భావిస్తున్నారు. ఆ దేశంలోని క్షిపణి కేంద్రాల్లో చాలా వరకు పర్వతాల అడుగున, భూగర్భ సొరంగాల్లో ఉన్నట్లు అంచనా. ఇలాంటి స్థావరాలు సుమారు 30 వరకు ఉండొచ్చని సమాచారం. మరోవైపు, 2018లో ఇరాన్ పలువురు వన్యప్రాణి సంరక్షకులు, పర్యావరణవేత్తలను అరెస్టు చేయడం కూడా అప్పట్లో చర్చనీయాంశమైంది. వారు సైనిక స్థావరాల సమీపంలో కెమెరాలు ఉపయోగిస్తున్నారనే ఆరోపణలు వచ్చాయి. యజ్ద్ ప్రాంతంలోని భారీ నీటి ప్రాజెక్టు, హర్మోజ్గాన్ ప్రావిన్స్లోని టారోమ్ రక్షిత ప్రాంతంపై జరిగిన దాడులు కూడా ఈ అనుమానాలకు కారణమవుతున్నాయని కథనాలు పేర్కొంటున్నాయి. అయితే, ఆనకట్టలు, నీటి ప్రాజెక్టులు సైనిక అవసరాల కోసమే నిర్మించారనే వాదనలకు స్వతంత్ర ధృవీకరణ అవసరం.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!