

తెలంగాణలో సినీ, మీడియా, వినోద రంగాలను అంతర్జాతీయ స్థాయికి తీసుకెళ్లే లక్ష్యంతో రాష్ట్ర ప్రభుత్వం ఇండియా జాయ్ 2026 నిర్వహణకు విస్తృత ఏర్పాట్లు చేస్తోంది. డిసెంబర్ 7 నుంచి 13 వరకు హైదరాబాద్లోని భారత్ ఫ్యూచర్ సిటీలో జరగనున్న ఇన్వెస్ట్ తెలంగాణ గ్లోబల్ సమ్మిట్ 2026లో భాగంగా ఈ కార్యక్రమాలు నిర్వహించనున్నారు. దీనికి సంబంధించి డాక్టర్ బీఆర్ అంబేద్కర్ తెలంగాణ సచివాలయంలో ఫిల్మ్ సెక్టార్ ఎగ్జిక్యూటివ్ కమిటీ సమావేశం జరిగింది. తెలుగు సినీ పరిశ్రమతో పాటు యానిమేషన్, విజువల్ ఎఫెక్ట్స్, గేమింగ్ రంగాల ప్రతినిధులు ఇందులో పాల్గొని తమ సూచనలు అందించారు. హైదరాబాద్ను అంతర్జాతీయ సృజనాత్మక రంగ కేంద్రంగా అభివృద్ధి చేసే అవకాశాలను ఐటీఈ అండ్ సీ శాఖ జాయింట్ సెక్రటరీ అనుదీప్ దురిశెట్టి వివరించారు. ఏవీజీసీ పాలసీ, ఇమేజ్ టవర్స్ అభివృద్ధి వంటి ప్రభుత్వ కార్యక్రమాలను ప్రస్తావించారు. తెలంగాణ ఫిల్మ్ డెవలప్మెంట్ కార్పొరేషన్ చైర్మన్ దిల్ రాజు, ఫిల్మ్ ఛాంబర్ అధ్యక్షుడు డి. సురేష్ బాబు సహా పలువురు సినీ ప్రముఖులు ఈ కార్యక్రమానికి మద్దతు ప్రకటించారు. ప్రొడ్యూసర్స్ కౌన్సిల్ అధ్యక్షుడు సి. కల్యాణ్, డైరెక్టర్స్ అసోసియేషన్ అధ్యక్షుడు వి.ఎన్. ఆదిత్య, మా ఉపాధ్యక్షుడు డాక్టర్ మాదాల రవి, దర్శకులు హరీశ్ శంకర్, సాయి రాజేష్, నటుడు-దర్శకుడు రాహుల్ రవీంద్ర తదితరులు సమావేశానికి హాజరయ్యారు.
సుమారు 15 ఎకరాల విస్తీర్ణంలో నిర్వహించనున్న ఇండియా జాయ్లో సినిమాలు, ఏవీజీసీ-ఎక్స్ఆర్, కచేరీలు, గేమింగ్, ప్రముఖులు, డిజిటల్ ఇన్ఫ్లుయెన్సర్లకు సంబంధించిన కార్యక్రమాలు ఉండనున్నాయి. లక్ష మందికి పైగా సందర్శకులు, 200కు పైగా ఎగ్జిబిటర్లు, 100 మందికి పైగా అంతర్జాతీయ పెట్టుబడిదారులు, కొనుగోలుదారులు, ఓటీటీ వేదికలు, స్టూడియోలు పాల్గొంటాయని ప్రభుత్వం అంచనా వేస్తోంది. నెట్ఫ్లిక్స్, డిస్నీ, సోనీ, అడోబ్, డీఎన్ఈజీ, ఈఏ స్పోర్ట్స్, యూబిసాఫ్ట్, అన్నపూర్ణ స్టూడియోస్, రామోజీ ఫిల్మ్ సిటీ వంటి సంస్థలు ఇందులో భాగం కానున్నాయి. వీఎఫ్ఎక్స్ సమ్మిట్, కామిక్ కాన్, ఇండీ గేమ్ ఉత్సవ్, ఓటీటీ పల్స్, ఇండీవుడ్ ఫిల్మ్ మార్కెట్, ఇండియన్ ఫిల్మ్ కాన్క్లేవ్, హైదరాబాద్ ఏఐ ఫిల్మ్ ఫెస్టివల్ సహా 15కు పైగా ఉప కార్యక్రమాలను నిర్వహించనున్నారు. డిసెంబర్ 8న రెడ్ కార్పెట్ వేడుక జరగనుండగా, డిసెంబర్ 9న ఆస్కార్ విజేత, పద్మశ్రీ పురస్కార గ్రహీత ఎం.ఎం. కీరవాణి కచేరీ వేదికను ప్రారంభించనున్నారు. గత కార్యక్రమాలతో పోలిస్తే ఈసారి ఇండియా జాయ్ను పదిరెట్ల విస్తృత స్థాయిలో నిర్వహించాలనే లక్ష్యంతో ప్రణాళికలు రూపొందిస్తున్నట్లు సమ్మిట్ వ్యూహాత్మక సలహాదారు అచల్ మల్హోత్రా తెలిపారు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!