

ఉత్తరాఖండ్లోని తెహ్రీ గఢ్వాల్ జిల్లా గూలర్ బజార్ సమీపంలో మంగళవారం ఉదయం ఘోర రోడ్డు ప్రమాదం చోటుచేసుకుంది. ప్రయాణికులతో వెళ్తున్న బస్సు అదుపుతప్పి వంతెనపై నుంచి సుమారు 100 మీటర్ల లోతున్న లోయలో పడిపోయింది. ఈ ఘటనలో ఎనిమిది మంది ప్రాణాలు కోల్పోగా, మరో 26 మంది తీవ్రంగా గాయపడ్డారు. ప్రమాద సమయంలో బస్సులో సుమారు 30 నుంచి 35 మంది ప్రయాణికులు ఉన్నట్లు సమాచారం. సమాచారం అందుకున్న వెంటనే రాష్ట్ర విపత్తు స్పందన దళం (ఎస్డీఆర్ఎఫ్), పోలీసులు ఘటనా స్థలానికి చేరుకుని సహాయక చర్యలు ప్రారంభించారు. లోయలో చిక్కుకున్న వారిని బయటకు తీసి, క్షతగాత్రులను అంబులెన్సుల్లో సమీప ఆస్పత్రులకు తరలించారు. అదనపు ఎస్డీఆర్ఎఫ్ బృందాలను కూడా రంగంలోకి దించారు. తెహ్రీ జిల్లా కలెక్టర్ నితికా ఖండేల్వాల్, ఎస్పీ శ్వేతా చౌబే ఘటనా స్థలానికి బయలుదేరారు. ఈ ప్రమాదంపై ప్రధాని నరేంద్ర మోదీ తీవ్ర దిగ్భ్రాంతి వ్యక్తం చేశారు. మృతుల కుటుంబాలకు సానుభూతి తెలియజేస్తూ, గాయపడిన వారు త్వరగా కోలుకోవాలని ఆకాంక్షించారు.
మరోవైపు, ఉత్తరాఖండ్లోని రుద్రప్రయాగ్ జిల్లాలో సోమవారం రాత్రి మరో ఘోర ప్రమాదం జరిగింది. బాన్సువాడ-మోహన్ఖల్ రహదారిపై వెళ్తున్న బొలెరో వాహనం అదుపుతప్పి లోయలో పడిపోవడంతో ఆరుగురు మృతి చెందగా, పలువురు గాయపడ్డారు. తక్కువ వ్యవధిలోనే రెండు ప్రమాదాలు చోటుచేసుకోవడంతో కొండ ప్రాంతాల్లో రహదారి భద్రతపై ఆందోళనలు వ్యక్తమవుతున్నాయి. రోడ్ల నిర్వహణపై అధికారులు ప్రత్యేక దృష్టి సారించి, ప్రమాదాల నివారణకు అవసరమైన రక్షణ చర్యలు చేపట్టాలని స్థానికులు కోరుతున్నారు.























కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!