నల్గొండ మున్సిపల్ కార్పొరేషన్‌ను సూపర్ స్మార్ట్ సిటీగా తీర్చిదిద్దుతా: మంత్రి కోమటిరెడ్డి

నల్గొండ మున్సిపల్ కార్పొరేషన్‌ను సూపర్ స్మార్ట్ సిటీగా తీర్చిదిద్దుతామని రాష్ట్ర రోడ్లు, భవనాలు, సినిమాటోగ్రఫీ శాఖల మంత్రి కోమటిరెడ్డి వెంకట్ రెడ్డి తెలిపారు. గురువారం నల్గొండ జిల్లా కేంద్రంలో పలు అభివృద్ధి పనులకు ఆయన శంకుస్థాపన చేశారు. కార్పొరేషన్ పరిధిలోని కథాల్‌గూడ నుంచి రాజీవ్ గృహకల్ప వరకు సుమారు మూడు కిలోమీటర్ల మేర రూ.10 కోట్లతో చేపట్టనున్న రహదారి విస్తరణ, పటిష్ఠీకరణ పనులకు శ్రీకారం చుట్టారు. తెలంగాణవ్యాప్తంగా రూ.25 వేల కోట్లతో హైమ్స్ రోడ్ల నిర్మాణం చేపడుతున్నామని, మండల కేంద్రాల నుంచి జిల్లా కేంద్రాలకు, గ్రామాల నుంచి మండల కేంద్రాలకు డబుల్ రోడ్లు వేస్తున్నామని మంత్రి వివరించారు. రాష్ట్రవ్యాప్తంగా సుమారు తొమ్మిది వేల కిలోమీటర్ల మేర రహదారులు నిర్మిస్తున్నామని, నల్గొండ జిల్లాలో రూ.2 వేల కోట్లతో డబుల్ రోడ్ల పనులు చేపట్టనున్నట్లు వెల్లడించారు. నల్గొండ నుంచి ధర్వేశిపురం వరకు రూ.50 కోట్లతో ఆరు లైన్ల రహదారి నిర్మాణం చేపట్టామని, ధర్వేశిపురం నుంచి కనగల్ వరకు హైమ్స్ రోడ్డు పనులు కొనసాగుతున్నాయని తెలిపారు.

నల్గొండ కార్పొరేషన్‌లో కేంద్ర, రాష్ట్ర ప్రభుత్వాల నిధులతో మరిన్ని అభివృద్ధి కార్యక్రమాలు చేపడతామని మంత్రి చెప్పారు. ఆర్టీసీ డిపోను రాష్ట్ర నిధులతో ఆధునికీకరించామని, ప్రతి ఇంటికీ నల్లా కనెక్షన్ అందించి 24 గంటల పాటు తాగునీరు సరఫరా చేసే ఏర్పాట్లను రాబోయే ఏడాదిన్నరలో పూర్తి చేస్తామని వెల్లడించారు. పట్టణంలోని ఇళ్లు లేని పేదలకు హౌసింగ్ బోర్డు సమీపంలో జీ ప్లస్ త్రీ నమూనాలో 500 ఇళ్లను నిర్మించి అందిస్తామని తెలిపారు. అంతకుముందు భవిత కేంద్రం ఆవరణలో రూ.17.50 కోట్లతో నిర్మించనున్న సమీకృత మండల సముదాయ భవనానికి మంత్రి శంకుస్థాపన చేశారు. ఈ కార్యక్రమంలో ఎమ్మెల్సీ శంకర్ నాయక్, మేయర్ బుర్రి చైతన్య శ్రీనివాస్ రెడ్డి, జిల్లా కలెక్టర్ బి. చంద్రశేఖర్, డిప్యూటీ మేయర్ అమీర్ అలీ, ఇతర అధికారులు, ప్రజాప్రతినిధులు పాల్గొన్నారు.