అమెరికా పర్యటనకు జిన్‌పింగ్‌.. ట్రంప్‌తో కీలక భేటీ

చైనా అధ్యక్షుడు షీ జిన్‌పింగ్‌ సెప్టెంబర్‌ 23 నుంచి 25 వరకు అమెరికాలో పర్యటించనున్నారు. అమెరికా అధ్యక్షుడు డొనాల్డ్‌ ట్రంప్‌ ఆహ్వానం మేరకు జిన్‌పింగ్‌ ఈ మూడు రోజుల పర్యటన చేపడుతున్నట్లు చైనా విదేశాంగ శాఖ అధికారికంగా ప్రకటించింది. ఇరు దేశాల ద్వైపాక్షిక సంబంధాలు, ప్రపంచ శాంతి, అభివృద్ధికి సంబంధించిన అంశాలపై ట్రంప్‌తో జిన్‌పింగ్‌ లోతైన చర్చలు జరపనున్నట్లు చైనా తెలిపింది. ఆరు నెలల వ్యవధిలో ఇరువురు దేశాధినేతలు పరస్పరం రెండుసార్లు భేటీ కావడం చారిత్రక మైలురాయిగా నిలుస్తుందని చైనా పేర్కొంది.

జిన్‌పింగ్‌ పర్యటన సందర్భంగా ట్రంప్‌ స్వయంగా జాయింట్‌ బేస్‌ ఆండ్రూస్‌కు వెళ్లి ఆయనకు స్వాగతం పలకనున్నారు. వాణిజ్యం, సుంకాలు, సాంకేతికత, కృత్రిమ మేధ, అరుదైన ఖనిజాలు, ప్రపంచ భద్రత వంటి అంశాలు చర్చల్లో ప్రధానంగా ఉండే అవకాశం ఉంది. ఇరాన్‌ పరిస్థితులు, పశ్చిమాసియా ఉద్రిక్తతలు, రష్యా-ఉక్రెయిన్‌ యుద్ధం వంటి అంతర్జాతీయ అంశాలపైనా చర్చ జరిగే అవకాశం ఉంది. పర్యటనకు ముందు ఇరు దేశాల అధికారులు వాణిజ్యం, ఏఐ తదితర అంశాలపై చర్చలు జరిపారు.