డిసెంబర్ బరిలో నాగార్జున?

అక్కినేని నాగార్జున తన కెరీర్‌లో ఎంతో ప్రతిష్టాత్మకంగా భావిస్తున్న 100వ చిత్రం ‘కింగ్ 100’పై భారీ అంచనాలు ఉన్నాయి. అక్కినేని అఖిల్ ‘లెనిన్’, నాగచైతన్య ‘తండేల్’ విజయాలతో కుటుంబంలో మంచి జోష్ కనిపిస్తున్న సమయంలో నాగార్జున కూడా తన ప్రత్యేకమైన చిత్రంతో ప్రేక్షకుల ముందుకు రావడానికి సిద్ధమవుతున్నారు. రా కార్తీక్ దర్శకత్వంలో టబు, ఐశ్వర్య రాజేష్ కీలక పాత్రల్లో నటిస్తున్న ఈ సినిమాను ముందుగా 2027 సంక్రాంతి సందర్భంగా విడుదల చేయాలని భావించారు. అయితే సంక్రాంతి బరిలో సినిమాల సంఖ్య ఎక్కువగా ఉండటంతో విడుదలను డిసెంబర్ 2026కు మార్చే ఆలోచనలో ఉన్నట్లు ప్రచారం జరుగుతోంది.

డిసెంబర్‌కు సినిమా వస్తే ఇప్పటికే ఆ నెలలో ఉన్న ప్రభాస్ ‘ఫౌజీ’, బాలకృష్ణ ‘NBK 111’ చిత్రాలతో నాగార్జున సినిమా పోటీ పడాల్సి ఉంటుంది. దీంతో డిసెంబర్‌లో మూడు భారీ చిత్రాల మధ్య ఆసక్తికరమైన పోటీ నెలకొనే అవకాశం కనిపిస్తోంది. అయితే ‘కింగ్ 100’ విడుదల తేదీపై పూర్తి స్పష్టత రావాలంటే నాగార్జున పుట్టినరోజైన ఆగస్టు 29న విడుదల కానున్న గ్లింప్స్ కోసం ఎదురుచూడాల్సిందే. ఆ రోజు చిత్రబృందం నుంచి కీలకమైన ప్రకటన వచ్చే అవకాశముందని సినీ వర్గాల్లో చర్చ జరుగుతోంది.