విడుదలకు ముందే ‘వృషకర్మ’ హవా.. భారీ డీల్‌తో ఇండస్ట్రీలో చర్చ?

అక్కినేని నాగచైతన్య కథానాయకుడిగా రూపొందుతున్న మిస్టికల్ సూపర్ నేచురల్ థ్రిల్లర్ ‘వృషకర్మ’పై ఇప్పటికే సినీ వర్గాల్లో భారీ అంచనాలు నెలకొన్నాయి. ‘విరూపాక్ష’ విజయంతో ప్రత్యేక గుర్తింపు పొందిన కార్తీక్ దండు దర్శకత్వం వహిస్తున్న ఈ సినిమా ఆసక్తికరమైన కథాంశంతో తెరకెక్కుతోంది. మిస్టరీ, ఆధ్యాత్మికత, థ్రిల్లింగ్ అంశాల మేళవింపుతో రూపొందుతున్న ఈ చిత్రంలో మీనాక్షి చౌదరి కథానాయికగా నటిస్తోంది. శ్రీ వెంకటేశ్వర సినీ చిత్ర, సుకుమార్ రైటింగ్స్ సంయుక్తంగా ఈ చిత్రాన్ని నిర్మిస్తున్నాయి.

ఇప్పటికే ఈ చిత్రానికి సంబంధించిన నాన్ థియేట్రికల్ హక్కులు భారీ ధరకు అమ్ముడైనట్లు టాలీవుడ్ వర్గాల్లో వార్తలు వినిపిస్తున్నాయి. ప్రముఖ సంస్థ జీ నెట్‌వర్క్ ఈ హక్కులను దాదాపు 48 కోట్ల రూపాయలకు దక్కించుకున్నట్లు ప్రచారం సాగుతోంది. ఈ డీల్ నిజమైతే నాగచైతన్య కెరీర్‌లోనే ఇది అతిపెద్ద వ్యాపార ఒప్పందంగా నిలవనుంది. విడుదలకు ముందే చిత్ర బడ్జెట్‌లో గణనీయమైన భాగం తిరిగి రావడంతో నిర్మాతల్లోనూ ఉత్సాహం కనిపిస్తోంది. 2026 చివర్లో ఈ చిత్రాన్ని ప్రేక్షకుల ముందుకు తీసుకురావడానికి మేకర్స్ సన్నాహాలు చేస్తున్నారు.