బటన్‌ బ్యాటరీలపై నిర్లక్ష్యం వద్దు.. చిన్నారుల భద్రతకు నిపుణుల కీలక సూచనలు

బొమ్మలు, టీవీ రిమోట్లు, వాచీలు, హియరింగ్‌ ఎయిడ్స్‌, కార్‌ కీలు, కాలిక్యులేటర్లు వంటి పరికరాల్లో ఉపయోగించే చిన్న బటన్‌ బ్యాటరీలు పిల్లలకు తీవ్ర ప్రమాదాన్ని కలిగించవచ్చు. పొరపాటున బ్యాటరీని మింగితే అది అన్నవాహికలో చిక్కుకుని వేగంగా కణజాలాన్ని దెబ్బతీయవచ్చు. తేమతో కూడిన కణజాలాన్ని బ్యాటరీ తాకినప్పుడు రసాయనిక ప్రతిచర్యలు జరిగి తీవ్రమైన కాలిన గాయాలు ఏర్పడే అవకాశం ఉంది. కొన్ని సందర్భాల్లో రెండు గంటల్లోపే తీవ్ర నష్టం సంభవించవచ్చని వైద్య నిపుణులు హెచ్చరిస్తున్నారు. అంతేకాదు, ప్రారంభంలో పిల్లల్లో ఎలాంటి స్పష్టమైన లక్షణాలు కనిపించకపోవచ్చు.

పిల్లలు బటన్‌ బ్యాటరీ మింగినట్లు అనుమానం వచ్చినా వెంటనే సమీపంలోని అత్యవసర విభాగానికి తీసుకెళ్లాలి. ఎక్స్‌రే ద్వారా బ్యాటరీ ఎక్కడ ఉందో వైద్యులు గుర్తిస్తారు. అన్నవాహికలో బ్యాటరీ చిక్కుకున్నట్లయితే దాన్ని అత్యవసరంగా ఎండోస్కోపీ ద్వారా తొలగించాల్సి ఉంటుంది. వాంతులు చేయించే ప్రయత్నం చేయకూడదు, లక్షణాలు కనిపించే వరకు వేచి ఉండకూడదు. ఇంట్లో విడిగా ఉంచే కొత్త, వాడిన బ్యాటరీలను పిల్లలకు అందకుండా భద్రంగా నిల్వ చేయడంతో పాటు, బొమ్మలు మరియు ఇతర పరికరాల్లోని బ్యాటరీ కవర్లు సురక్షితంగా మూసి ఉన్నాయో తరచూ పరిశీలించాలి.