వెన్నెముకలో ఈ మార్పులు కనిపిస్తే జాగ్రత్త.. వైద్యుల హెచ్చరిక

స్కోలియోసిస్ లేదా పార్శ్వ గూని అనేది వెన్నెముక పక్కకు వంగి "ఎస్" లేదా "సి" ఆకారంలో కనిపించే సమస్య. ఇది ముఖ్యంగా 10 నుంచి 15 సంవత్సరాల మధ్య వయస్సు గల పిల్లల్లో ఎక్కువగా కనిపించినప్పటికీ, ఏ వయస్సు వారికైనా రావచ్చు. న్యూరోసర్జన్ డాక్టర్ సాయుజ్ కృష్ణన్ ఎస్ తెలిపిన వివరాల ప్రకారం, చాలా సందర్భాల్లో దీనికి ఖచ్చితమైన కారణం తెలియదు. పుట్టుకతో వచ్చే వెన్నెముక లోపాలు, నరాలు లేదా కండరాల సమస్యలు, వయసు సంబంధిత మార్పులు, కనెక్టివ్ టిష్యూ లోపాలు కూడా ఈ సమస్యకు కారణమవుతాయి.

ప్రారంభ దశలో స్కోలియోసిస్ సాధారణంగా నొప్పి లేకుండా ఉంటుంది. భుజాలు అసమానంగా ఉండటం, నడుము వంకరగా కనిపించడం, ఒక హిప్ మరొకదానికంటే పైకి ఉండటం వంటి లక్షణాలు కనిపించవచ్చు. తీవ్రస్థాయికి చేరితే వెన్నునొప్పి, కండరాల అలసట, శ్వాస తీసుకోవడంలో ఇబ్బందులు ఎదురయ్యే అవకాశం ఉంది. శారీరక పరీక్షలు, ఎక్స్-రే ద్వారా నిర్ధారణ చేసి తీవ్రతను బట్టి పర్యవేక్షణ, బ్రేస్ చికిత్స, ఫిజియోథెరపీ, ప్రత్యేక వ్యాయామాలు లేదా శస్త్రచికిత్సను సూచిస్తారు. ముందుగానే గుర్తిస్తే ఈ సమస్యను సమర్థంగా నియంత్రించవచ్చని వైద్య నిపుణులు సూచిస్తున్నారు.

గమనిక: ఈ కథనం కేవలం సాధారణ సమాచారం కోసం మాత్రమే. ఆరోగ్య సమస్యలు లేదా లక్షణాలు ఉంటే సరైన నిర్ధారణ, చికిత్స కోసం అర్హత కలిగిన వైద్యుడిని సంప్రదించండి.