ప్రేమకథలకు కొత్త నిర్వచనం.. ‘చెన్నై లవ్‌స్టోరీ’ - సాయిరాజేశ్‌

సాయిరాజేశ్ కథ అందిస్తూ, ఎస్.కె.ఎన్‌తో కలిసి నిర్మిస్తున్న ‘చెన్నై లవ్‌స్టోరీ’ సినిమాపై ప్రేక్షకుల్లో ఆసక్తి పెరుగుతోంది. కిరణ్ అబ్బవరం, శ్రీగౌరీప్రియ జంటగా నటిస్తున్న ఈ చిత్రానికి రవి నంబూరి దర్శకత్వం వహిస్తుండగా, మణిశర్మ సంగీతం అందిస్తున్నారు. ఇటీవల తిరుపతిలో నిర్వహించిన ప్రత్యేక కార్యక్రమంలో ‘జిగితార...’ పాటను విడుదల చేశారు. ఈ సందర్భంగా కిరణ్ అబ్బవరం మాట్లాడుతూ, సినిమా భావోద్వేగాలు, సంభాషణలు ప్రేక్షకులకు చాలా కాలం గుర్తుండిపోతాయని అన్నారు. ఇందులో తాను ‘స్టీవెన్’ పాత్రలో నటిస్తున్నట్లు తెలిపారు.

సాయిరాజేశ్ మాట్లాడుతూ, ఇది గాఢమైన భావోద్వేగాలతో నిండిన ప్రేమకథ అని, ప్రేక్షకులు హీరోయిన్ పాత్ర ‘నివి’తో ప్రేమలో పడతారని చెప్పారు. శ్రీగౌరీప్రియకు ఈ సినిమా మంచి గుర్తింపు తీసుకురానుందని అభిప్రాయపడ్డారు. సంగీత దర్శకుడు మణిశర్మ ‘జిగితార’ పాట ప్రత్యేకతను ప్రస్తావించగా, దర్శకుడు రవి నంబూరి ఈ కథ తనకు ఎంతో సంతృప్తి ఇచ్చిందన్నారు. చిత్రబృందం మొత్తం ఈ సినిమా ప్రేక్షకులను ఆకట్టుకుంటుందనే నమ్మకాన్ని వ్యక్తం చేసింది.