అనిరుధ్-కావ్య మారన్ పెళ్లి బజ్.. కోలీవుడ్‌లో మళ్లీ చర్చలు!

స్టార్ సంగీత దర్శకుడు అనిరుధ్ రవిచందర్, సన్ గ్రూప్ ఎగ్జిక్యూటివ్ డైరెక్టర్ కావ్య మారన్ వివాహం చేసుకోబోతున్నారనే ప్రచారం మరోసారి తమిళ సినీ వర్గాల్లో చర్చనీయాంశంగా మారింది. "జైలర్ 2" విడుదల అనంతరం వచ్చే నవంబర్ రెండో వారంలో వీరి వివాహం జరిగే అవకాశముందనే వార్తలు సోషల్ మీడియాలో విస్తృతంగా ప్రచారం అవుతున్నాయి. అయితే ఈ విషయంపై అనిరుధ్ గానీ, కావ్య మారన్ గానీ ఇప్పటివరకు ఎలాంటి అధికారిక ప్రకటన చేయలేదు. గత ఏడాది నుంచి వీరిద్దరి స్నేహం, రిలేషన్‌షిప్ గురించి తరచూ పుకార్లు వినిపిస్తూనే ఉన్నాయి.

ఇదే తరహా వార్తలు గతంలో వచ్చినప్పుడు అనిరుధ్ స్వయంగా స్పందించి వాటిని ఖండించారు. అయితే న్యూయార్క్‌లో ఇద్దరూ కలిసి కనిపించారనే వార్తలతో ఈ చర్చ మళ్లీ ఊపందుకుంది. ఇటీవల అనిరుధ్ బాబాయ్, నటుడు వై.జి. మహేంద్రన్ ఒక ఇంటర్వ్యూలో ఆయన పెళ్లి త్వరలోనే ఉంటుందని సూచన ఇవ్వడం ఈ ప్రచారానికి మరింత బలం చేకూర్చింది. ప్రస్తుతం అనిరుధ్ భారతీయ సినీ పరిశ్రమలో అత్యంత బిజీ సంగీత దర్శకుల్లో ఒకరిగా కొనసాగుతుండగా, కావ్య మారన్ కూడా మీడియా, క్రీడా రంగాల్లో కీలక బాధ్యతలు నిర్వహిస్తున్నారు. దీంతో ఈ ప్రచారంపై అధికారిక స్పష్టత కోసం అభిమానులు ఆసక్తిగా ఎదురుచూస్తున్నారు.