మన బలమైన హిట్ ఫార్ములాని పూర్తిగా పక్కన పెట్టేసిన టాలీవుడ్?

తెలుగు సినిమా ఒకప్పుడు అందమైన ప్రేమకథలు, కుటుంబ అనుబంధాలు, సహజమైన హాస్యంతో దేశవ్యాప్తంగా ప్రత్యేక గుర్తింపు సంపాదించుకుంది. 'నువ్వే కావాలి', 'నువ్వు నాకు నచ్చావ్', 'నువ్వే నువ్వే', 'మనసంతా నువ్వే', 'సంతోషం', 'మన్మథుడు' వంటి చిత్రాలు తక్కువ ఖర్చుతోనే ప్రేక్షకులను థియేటర్లకు రప్పించాయి. అయితే ప్రస్తుతం పాన్ ఇండియా పోటీ నేపథ్యంలో భారీ యాక్షన్ కథలకే దర్శక నిర్మాతలు ఎక్కువ ప్రాధాన్యత ఇస్తున్నారు. ఈ క్రమంలో మన పరిశ్రమకు అసలైన బలమైన ప్రేమకథలు, కుటుంబ చిత్రాలు వెనుకబడుతున్నాయనే అభిప్రాయాలు వ్యక్తమవుతున్నాయి. అయినప్పటికీ మంచి భావోద్వేగాలతో కూడిన కథలకు ఇప్పటికీ ఆదరణ తగ్గలేదని కొన్ని విజయవంతమైన చిత్రాలు నిరూపించాయి.

సందీప్ రెడ్డి వంగా తెరకెక్కించిన 'అర్జున్ రెడ్డి' ఇతర భాషల్లోనూ ప్రేక్షకులను ఆకట్టుకోగా, 'సీతారామం' ప్రేమకథ సినీ అభిమానుల మనసులు గెలుచుకుంది. ఇలాంటి చిత్రాలను మొదటి నుంచే దేశవ్యాప్తంగా విడుదల చేస్తే మరింత పెద్ద విజయాలు సాధించే అవకాశం ఉందనే చర్చ జరుగుతోంది. ముఖ్యంగా సుకుమార్, సందీప్ రెడ్డి వంగా వంటి దర్శకులు ఓ మంచి ప్రేమకథను తెరకెక్కిస్తే ప్రేక్షకుల్లో ఆసక్తి పెరగడం ఖాయమనే అభిప్రాయాలు వినిపిస్తున్నాయి. అన్ని భాషల్లోనూ భారీ యాక్షన్ చిత్రాలే వస్తున్న ప్రస్తుత పరిస్థితుల్లో మనసుకు హత్తుకునే కథతో ముందుకొస్తే తెలుగు సినిమాకు కొత్త మార్కెట్ ఏర్పడవచ్చు. మరి ఈ దిశగా మన దర్శక నిర్మాతలు ఎప్పుడు అడుగులు వేస్తారో చూడాలి.