సుకేశ్ కేసులో కీలక మలుపు.. జాక్వెలిన్ పిటిషన్‌పై నేడు విచారణ

రూ.200 కోట్ల మనీలాండరింగ్ కేసులో బాలీవుడ్ నటి జాక్వెలిన్ ఫెర్నాండెజ్ దాఖలు చేసిన పిటిషన్‌పై జూన్ 11న సుప్రీంకోర్టు విచారణ చేపట్టనుంది. ప్రముఖ మోసగాడు సుకేశ్ చంద్రశేఖర్‌కు సంబంధించిన ఈ కేసులో తనపై నమోదైన ఛార్జ్‌షీట్‌ను కొట్టివేయాలని జాక్వెలిన్ కోర్టును ఆశ్రయించారు. నేరాల ద్వారా వచ్చిన సొమ్ముతో కొనుగోలు చేసిన విలాసవంతమైన బహుమతులను ఆమె స్వీకరించారని ఈడీ ఆరోపిస్తోంది. అయితే సుకేశ్ అసలు కార్యకలాపాల గురించి తనకు ఎలాంటి అవగాహన లేదని, తాను మోసపోయానని జాక్వెలిన్ వాదిస్తున్నారు.

కేవలం బహుమతులు స్వీకరించడం వల్ల మనీలాండరింగ్ నేరానికి బాధ్యురాలిగా పరిగణించలేమని ఆమె తరపు న్యాయవాదులు చెబుతున్నారు. ఈ కేసులో సుప్రీంకోర్టు తీర్పు జాక్వెలిన్ కెరీర్‌, విదేశీ పర్యటనలు, భవిష్యత్ ప్రాజెక్టులపై ప్రభావం చూపే అవకాశం ఉంది. అనుకూల తీర్పు వస్తే ఆమెకు భారీ ఊరట లభించవచ్చు. లేకపోతే ఈ న్యాయపోరాటం మరికొంతకాలం కొనసాగవచ్చని న్యాయవర్గాలు భావిస్తున్నాయి.