వీక్‌డేస్ సవాల్‌కు ‘లెనిన్’ సిద్ధం.. నిలబడితే లాంగ్ రన్ ఖాయం?

అక్కినేని అఖిల్ హీరోగా, భాగ్యశ్రీ బోర్సే హీరోయిన్‌గా దర్శకుడు మురళీ కిషోర్ అబ్బూరు తెరకెక్కించిన ‘లెనిన్’ బాక్సాఫీస్ వద్ద మంచి స్పందనను సొంతం చేసుకుంటోంది. విడుదలైన తొలి రోజునుంచే ప్రేక్షకుల ఆదరణ పొందిన ఈ చిత్రం వీకెండ్ రోజుల్లో హౌస్‌ఫుల్ ప్రదర్శనలతో దూసుకెళ్లింది. కథ, భావోద్వేగాలు, సంగీతం, నటీనటుల ప్రదర్శనలకు ప్రేక్షకుల నుంచి మంచి స్పందన రావడంతో సినిమాపై సానుకూల వాతావరణం నెలకొంది. అయితే అసలు పరీక్ష ఇప్పుడు ప్రారంభమవుతుందనే అభిప్రాయం ట్రేడ్ వర్గాల్లో వ్యక్తమవుతోంది. సెలవు రోజుల ఊపు ముగిసిన తర్వాత వర్కింగ్ డేస్‌లో సినిమా ప్రదర్శన ఎలా ఉంటుందన్నదే ఇప్పుడు ప్రధాన చర్చగా మారింది.

సాధారణంగా వీకెండ్ తర్వాత కలెక్షన్లు తగ్గే అవకాశం ఉన్నప్పటికీ, మంచి కంటెంట్ ఉన్న సినిమాలకు తెలుగు ప్రేక్షకులు ఎప్పుడూ అండగా నిలిచిన సందర్భాలు ఎన్నో ఉన్నాయి. ఇటీవల విడుదలైన ‘మా ఇంటి బంగారం’ అందుకు ఉదాహరణగా నిలిచిందనే అభిప్రాయాలు వ్యక్తమవుతున్నాయి. అదే తరహాలో ‘లెనిన్’ కూడా సోమవారం నుంచి స్థిరమైన వసూళ్లను నమోదు చేస్తే, దీర్ఘకాల ప్రదర్శనలో ఈ చిత్రాన్ని నిలువరించడం కష్టమనే విశ్లేషణలు వినిపిస్తున్నాయి. థమన్ సంగీతం అందించిన ఈ చిత్రాన్ని సూర్యదేవర నాగవంశీ, కింగ్ నాగార్జున నిర్మించారు.