‘రామాయణం’లో సీత పాత్ర చిత్రణపై ముఖేష్ ఖన్నా అభ్యంతరం

‘శక్తిమాన్’, బి.ఆర్. చోప్రా తెరకెక్కించిన ‘మహాభారత్’లో భీష్మ పితామహుడి పాత్రలతో గుర్తింపు పొందిన బాలీవుడ్ నటుడు ముఖేష్ ఖన్నా.. రాబోయే ‘రామాయణం’ సినిమాలో సీత పాత్ర చిత్రణపై తీవ్ర అభ్యంతరం వ్యక్తం చేశారు. ఈ చిత్రంలో సాయి పల్లవి సీత పాత్రలో నటిస్తున్నారు. తాజాగా విడుదల చేసిన సుదీర్ఘ వీడియోలో సీతను యుద్ధాలు చేసే వీరనారిగా చూపించడంపై ఖన్నా ప్రశ్నలు లేవనెత్తారు. వాల్మీకి రామాయణాన్ని తాను చదివానని, అందులో సీతాదేవి ఝాన్సీ లక్ష్మీబాయిలా లేదా ఆధునిక యాక్షన్ హీరోయిన్ల తరహాలో పోరాటం చేసినట్లు ఎక్కడా లేదని వ్యాఖ్యానించారు. 14 ఏళ్ల వనవాస సమయంలో కూడా సీత ఎలాంటి యుద్ధంలో పాల్గొనలేదని ఆయన పేర్కొన్నారు.

ఖరుడు, దూషణుల ఘట్టాన్ని ప్రస్తావిస్తూ వారితో శ్రీరాముడు ఒక్కడే పోరాడి ఓడించారని, ఆ సమయంలో సీత, లక్ష్మణులు యుద్ధభూమిలో లేరని ముఖేష్ ఖన్నా అన్నారు. సీతను యోధురాలిగా చూపిస్తే, రావణుడు అపహరించే సమయంలో ఆమె ఎందుకు ప్రతిఘటించలేదని కూడా ప్రశ్నించారు. సీతను రావణుడు అపహరించి అశోకవనంలో ఉంచిన ఘట్టానికి ఈ చిత్రణ భిన్నంగా ఉందని అభిప్రాయపడ్డారు. ఈ సన్నివేశం ‘అద్భుత రామాయణం’ ఆధారంగా రూపొందించామని నిర్మాత నమిత్ మల్హోత్రా చెప్పడంపై స్పందిస్తూ, తాను ఆశ్చర్యపోయానని తెలిపారు. వాల్మీకి రామాయణానికి అనుగుణంగానే కథను చూపించాలని, రావణుడికి రాముడి కంటే ఎక్కువ ప్రాధాన్యం ఇస్తున్నారనే అభ్యంతరాన్ని కూడా ఆయన వ్యక్తం చేశారు. సినిమా బడ్జెట్‌గా ప్రచారంలో ఉన్న రూ.4,000 కోట్లను తిరిగి రాబట్టుకోవడంపైనే మేకర్స్ దృష్టి పెట్టారని విమర్శించారు. ‘ఆదిపురుష్’ సినిమాపై వచ్చిన వ్యతిరేకతను గుర్తు చేస్తూ, ఆ అనుభవం నుంచి పాఠం నేర్చుకోవాలని సూచించారు.

అయితే, తాను ఇంకా ‘రామాయణం’ సినిమాను చూడలేదని ముఖేష్ ఖన్నా స్పష్టం చేశారు. సినిమా ప్రమోషనల్ కంటెంట్, ప్రేక్షకుల స్పందన ఆధారంగానే ఈ వ్యాఖ్యలు చేస్తున్నట్లు తెలిపారు. టికెట్ ధర రూ.1,200గా ఉండటంపైనా అభ్యంతరం వ్యక్తం చేస్తూ, లాభాల గురించే ఆలోచించే చిత్ర నిర్మాతల సినిమా కోసం అంత మొత్తం ఖర్చు చేయాలని అనుకోవడం లేదని అన్నారు. సినిమాపై అనుపమ్ ఖేర్ ఇచ్చిన సానుకూల సమీక్షను కూడా ఆయన ‘సిగ్గుచేటు’గా అభివర్ణించారు. మతపరమైన ఇతిహాసాల్లో మార్పులు చేయడాన్ని ఖురాన్, బైబిల్ వంటి పవిత్ర గ్రంథాల్లో మార్పులు చేయడంతో పోల్చారు. సృజనాత్మక స్వేచ్ఛ పేరుతో పూజనీయమైన మతపరమైన పాత్రల కథలను మార్చకూడదన్నది ఆయన అభిప్రాయం. ముఖేష్ ఖన్నా చేసిన వ్యాఖ్యలపై చిత్ర బృందం నుంచి ఇప్పటివరకు ఎలాంటి స్పందన రాలేదు.