బాలీవుడ్‌లో విలన్‌గా నిత్యామీనన్‌.. కొత్త అవతారంలో నటి

విభిన్న కథలు, సహజమైన నటనతో ప్రేక్షకుల్లో ప్రత్యేక గుర్తింపు సంపాదించుకున్న నటి నిత్యామీనన్‌ ఇప్పుడు బాలీవుడ్‌లో సరికొత్త పాత్రతో అలరించేందుకు సిద్ధమవుతున్నారు. ఇప్పటివరకు ఎక్కువగా పాజిటివ్‌ పాత్రల్లో కనిపించిన ఆమె.. ఈసారి నెగెటివ్‌ షేడ్స్‌ ఉన్న పాత్రలో కనిపించనున్నట్లు సమాచారం. వివేక్‌ ఒబెరాయ్‌ ప్రధాన పాత్రలో నటిస్తున్న ‘మిస్టర్‌ అండ్‌ మిసెస్‌ గ్రే’ చిత్రంలో నిత్యామీనన్‌ ప్రతినాయకురాలిగా నటిస్తున్నట్లు సినీ వర్గాల్లో ప్రచారం జరుగుతోంది. దీంతో ఈ సినిమాలో ఆమె పాత్ర ఎలా ఉండబోతుందనే ఆసక్తి ప్రేక్షకుల్లో నెలకొంది.

ఏడేళ్ల క్రితం ‘మిషన్‌ మంగళ్‌’ సినిమాతో బాలీవుడ్‌లోకి అడుగుపెట్టిన నిత్యామీనన్‌.. ఇప్పుడు మరో హిందీ చిత్రంతో ప్రేక్షకుల ముందుకు రానున్నారు. మర్డర్‌ మిస్టరీ థ్రిల్లర్‌గా తెరకెక్కుతున్న ‘మిస్టర్‌ అండ్‌ మిసెస్‌ గ్రే’ నుంచి చిత్రబృందం మంగళవారం ఫస్ట్‌లుక్‌ పోస్టర్‌ను విడుదల చేసింది. రెట్రో శైలిలో రూపొందించిన ఈ పోస్టర్‌ సినిమాపై ఆసక్తిని పెంచుతోంది. వేవ్‌బ్యాండ్‌ ప్రొడక్షన్స్‌ బ్యానర్‌పై దాదాపు మూడేళ్లుగా నిర్మాణంలో ఉన్న ఈ చిత్రానికి అంకుర్‌ పజ్నీ, విశాల్‌ రంజన్‌ మిశ్రా దర్శకత్వం వహిస్తున్నారు. శ్రేయా శర్మ, ఆశిష్‌ విద్యార్థి కీలక పాత్రల్లో నటిస్తున్నారు. ఈ సినిమాను డిసెంబర్‌ 11న ప్రపంచవ్యాప్తంగా విడుదల చేయనున్నట్లు మేకర్స్‌ ప్రకటించారు.