‘కిల్లర్’ కోటి రూపాయల కాంటెస్ట్‌లో విజేతలు లేరు..

ఇటీవల విడుదలైన ‘కిల్లర్’ సినిమా సెకండాఫ్ ట్విస్ట్‌ను కచ్చితంగా ఊహించిన వారికి కోటి రూపాయల బహుమతి ఇస్తామని చిత్రబృందం ప్రకటించిన సంగతి తెలిసిందే. తాజాగా ఈ కాంటెస్ట్ ఫలితాలను నటుడు, నిర్మాత, దర్శకుడు పూర్వాజ్ వెల్లడించారు. సుమారు 5 వేల మంది తమ సమాధానాలతో స్క్రీన్‌షాట్లు పంపగా, సినిమాలోని ట్విస్ట్‌ను ఎవరూ కచ్చితంగా అంచనా వేయలేకపోయారని తెలిపారు.

అయితే, సరైన సమాధానానికి దగ్గరగా అంచనా వేసిన 10 మందిని ఎంపిక చేసి ఒక్కొక్కరికి రూ.లక్ష చొప్పున మొత్తం రూ.10 లక్షల బహుమతి అందించనున్నట్లు ప్రకటించారు. విజేతలతో కలిసి లంచ్ చేయనున్నట్లు కూడా వెల్లడించారు. ‘కిల్లర్’ సినిమాకు థియేటర్లలో రూ.2 కోట్ల గ్రాస్ వసూళ్లు రాగా, ఓటీటీ, ఇతర వ్యాపారాల ద్వారా మరో రూ.8 కోట్ల వరకు ఆదాయం వచ్చిందని పూర్వాజ్ పేర్కొన్నారు. రూ.5 కోట్ల పెట్టుబడికి రూ.8 కోట్ల రాబడి రావడంతో సినిమా లాభాల్లో ఉందని, త్వరలో ‘కిల్లర్ 2’ను తెరకెక్కించనున్నట్లు తెలిపారు. మరోవైపు, సినిమాకు ప్రేక్షకులు, విమర్శకుల నుంచి మంచి స్పందన లభించిందని కథానాయిక జ్యోతి పూర్వాజ్ చెప్పారు.