‘స్పిరిట్‌’ షూటింగ్‌కు ప్రభాస్‌ ఇంకా దూరమే

సందీప్‌ రెడ్డి వంగా దర్శకత్వంలో ప్రభాస్‌ హీరోగా తెరకెక్కుతున్న ‘స్పిరిట్‌’పై భారీ అంచనాలు నెలకొన్నాయి. దాదాపు రెండు నెలల క్రితం ఈ సినిమా కోసం ప్రభాస్‌ సుమారు 50 రోజుల షూటింగ్‌ను పూర్తి చేశారు. అనంతరం మరో చిత్రం ‘ఫౌజీ’లో తనకు సంబంధించిన షూటింగ్‌ను పూర్తి చేసేందుకు వెళ్లారు. ‘ఫౌజీ’ పనులు ముగించుకుని సెప్టెంబర్‌లో ‘స్పిరిట్‌’ తదుపరి షెడ్యూల్‌లో పాల్గొంటారని అంచనాలు వ్యక్తమైనా ఇప్పటివరకు ఆయన షూటింగ్‌లో చేరలేదు.

ప్రస్తుతం ముంబైలో ‘స్పిరిట్‌’ షూటింగ్‌ ప్రభాస్‌ లేకుండానే కొనసాగుతోంది. ‘ఫౌజీ’ షూటింగ్‌ పూర్తి చేసి ప్రభాస్‌ ఎప్పుడు ‘స్పిరిట్‌’ సెట్స్‌లోకి వస్తారా అని అభిమానులు ఆసక్తిగా ఎదురుచూస్తున్నారు. ఇదిలా ఉండగా, ‘ఫౌజీ’ డిసెంబర్‌ 3, 2026న విడుదల కావాల్సి ఉండగా ఆ తేదీ నుంచి తప్పుకుని 2027లో ప్రేక్షకుల ముందుకు వచ్చే అవకాశముంది. దీంతో మార్చి 5, 2027న విడుదల కావాల్సిన ‘స్పిరిట్‌’ విడుదల తేదీ కూడా మారుతుందనే ప్రచారం జరుగుతోంది. అయితే దీనిపై అధికారికంగా ఎలాంటి ప్రకటన వెలువడలేదు. టీ-సిరీస్‌, భద్రకాళి పిక్చర్స్‌ సంయుక్తంగా నిర్మిస్తున్న ఈ చిత్రానికి హర్షవర్ధన్‌ రామేశ్వర్‌ సంగీతం అందిస్తున్నారు. వివేక్‌ ఒబెరాయ్‌ ప్రతినాయకుడిగా కనిపించనున్నారు.