అర్జున్‌ దాస్‌ మూవీతో తమిళ ఇండస్ట్రీలోకి ప్రీతి పగడాల

సోషల్‌ మీడియాలో తన రీల్స్‌తో భారీగా ఫాలోయింగ్‌ సంపాదించుకున్న ప్రీతి పగడాల.. ‘పతంగ్‌’ చిత్రంతో టాలీవుడ్‌లో హీరోయిన్‌గా పరిచయమైంది. ఈ సినిమా బాక్సాఫీస్‌ వద్ద ఆశించిన స్థాయిలో విజయం సాధించకపోయినా, విమర్శకుల నుంచి ప్రశంసలు అందుకుంది. ముఖ్యంగా ప్రీతి పగడాల నటనకు మంచి స్పందన లభించింది. తెలుగులో తొలి చిత్రంతో గుర్తింపు తెచ్చుకున్న ఆమె.. ఇప్పుడు నేరుగా కోలీవుడ్‌లోకి అడుగుపెడుతోంది. స్టార్‌ హీరో అర్జున్‌ దాస్‌ సరసన నటించే అవకాశం దక్కించుకుంది. తాజాగా ఈ చిత్రానికి సంబంధించిన పూజా కార్యక్రమాలు ఘనంగా నిర్వహించగా, అందుకు సంబంధించిన ఫొటోలు వైరల్‌గా మారాయి.

రంజిత్‌ జయకొడి దర్శకత్వంలో తెరకెక్కుతున్న ఈ చిత్రం పక్కా ఫ్యామిలీ రొమాన్స్‌ డ్రామాగా రూపొందుతోంది. ప్రేమ, కుటుంబ భావోద్వేగాలతో పాటు వినోదభరితమైన కామెడీకి కూడా ఇందులో ప్రాధాన్యం ఉంటుందని మేకర్స్‌ తెలిపారు. సిల్వర్‌ ట్రీ స్టూడియోస్‌ బ్యానర్‌పై తెరకెక్కుతున్న తొలి చిత్రం ఇదే కావడం విశేషం. ప్రొడక్షన్‌ నంబర్‌ 1గా రూపొందుతున్న ఈ సినిమాలో రవికుమార్‌, శరవణన్‌, యోగిబాబు, బాల శరవణన్‌, అశ్వినీ నంబియార్‌, జగన్‌ కృష్ణన్‌ కీలక పాత్రల్లో కనిపించనున్నారు. విజయ్‌ ఎంపీ, షణ్యుగ ప్రియన్‌ సంయుక్తంగా నిర్మిస్తున్నారు. సోషల్‌ మీడియా స్టార్‌గా కెరీర్‌ ప్రారంభించి, ఇప్పుడు అర్జున్‌ దాస్‌ సరసన అవకాశం దక్కించుకోవడంతో ప్రీతి పగడాల పేరు సినీ వర్గాల్లో ఆసక్తికరంగా మారింది.