రామ్‌ చరణ్‌ ‘గేమ్‌ ఛేంజర్‌’ కథను మార్చేశారు.. కార్తిక్‌ సుబ్బరాజ్‌ ఆసక్తికర వ్యాఖ్యలు

‘ఆర్ఆర్ఆర్‌’ వంటి ఆస్కార్‌ విజేత చిత్రంలో నటించిన తర్వాత రామ్‌ చరణ్‌ హీరోగా నటించిన సినిమా ‘గేమ్‌ ఛేంజర్‌’. శంకర్‌ దర్శకత్వంలో రూపొందిన ఈ చిత్రం గతేడాది సంక్రాంతి సందర్భంగా విడుదలై బాక్సాఫీస్‌ వద్ద ఆశించిన విజయాన్ని అందుకోలేకపోయింది. తాజాగా ఈ సినిమా కథకు సంబంధించి ప్రముఖ దర్శకుడు కార్తిక్‌ సుబ్బరాజ్‌ ఆసక్తికర విషయాలను వెల్లడించారు. ‘పిజ్జా’, ‘పెట్టా’, ‘మహాన్‌’, ‘జిగర్తాండ’ వంటి చిత్రాలతో గుర్తింపు తెచ్చుకున్న ఆయన.. తన తాజా చిత్రం ‘డోరతి’ ప్రమోషన్లలో భాగంగా ఇచ్చిన ఇంటర్వ్యూలో ‘గేమ్‌ ఛేంజర్‌’ గురించి మాట్లాడారు.

కార్తిక్‌ సుబ్బరాజ్‌ మాట్లాడుతూ.. ‘గేమ్‌ ఛేంజర్‌’ కోసం తాను వాస్తవిక నేపథ్యంతో కూడిన కథను రాసినట్లు తెలిపారు. ఒక ఐఏఎస్‌ అధికారి తన అధికారులతో కలిసి వ్యవస్థలో మార్పు తీసుకురావడాన్ని గ్యాంగ్‌స్టర్‌ కోణంలో ఆ కథలో చూపించానని వివరించారు. ఈ కథను శంకర్‌కు వినిపించగా ఆయనకు నచ్చిందని, పూర్తి స్క్రీన్‌ప్లే రాయాలని కోరారని చెప్పారు. అయితే, అప్పట్లో ‘మహాన్‌’ సినిమా ప్రీ-ప్రొడక్షన్‌ పనుల్లో బిజీగా ఉండటంతో ఆ కథపై మరింతగా దృష్టి పెట్టలేకపోయానని తెలిపారు. ఆ తర్వాత ‘గేమ్‌ ఛేంజర్‌’ భారీ బడ్జెట్‌ చిత్రంగా, రామ్‌ చరణ్‌ హీరోగా రూపొందే దశకు వచ్చేసరికి కథ స్వరూపం మారిపోయిందని కార్తిక్‌ సుబ్బరాజ్‌ వెల్లడించారు.