కొత్త ప్రయోగానికి రెడీ అవుతున్న రెజీనా కసాండ్రా

కంటెంట్‌కు ప్రాధాన్యత ఉన్న చిత్రాలను ఎంచుకుంటూ హీరోయిన్‌గా కొనసాగుతున్న రెజీనా కసాండ్రా మరో కొత్త ప్రయోగానికి సిద్ధమవుతున్నట్లు తెలుస్తోంది. ‘సిల నేరంగలిల్ సిల మనితర్గళ్’, ‘బాంబ్’ వంటి చిత్రాలతో దర్శకుడిగా గుర్తింపు తెచ్చుకున్న విశాల్ వెంకట్ తెరకెక్కించనున్న తదుపరి ప్రాజెక్టులో రెజీనా నటించనున్నట్లు సమాచారం. ఇది మహిళా ప్రధాన చిత్రంగా రూపొందనుండగా, ఇందులో రెజీనా శక్తివంతమైన కేంద్ర పాత్రలో కనిపించనున్నట్లు తెలుస్తోంది.

ఈ చిత్రానికి సంబంధించిన రెగ్యులర్ షూటింగ్ ఇటీవల ప్రారంభమైనట్లు సమాచారం. చిత్రీకరణను మేకర్స్ ఎలాంటి హడావుడి లేకుండా కొనసాగిస్తున్నట్లు తెలుస్తోంది. ప్రముఖ నిర్మాణ సంస్థ మైత్రీ మూవీ మేకర్స్, దర్శకుడు లోకేశ్ కనగరాజ్‌కు చెందిన జీ స్క్వాడ్ సంస్థలు సంయుక్తంగా ఈ ప్రాజెక్టును ప్రతిష్టాత్మకంగా నిర్మిస్తున్నట్లు సమాచారం. సినిమా టైటిల్‌తో పాటు ఇతర నటీనటులు, సాంకేతిక నిపుణుల వివరాలను త్వరలో అధికారికంగా వెల్లడించనున్నట్లు తెలుస్తుండగా, ప్రస్తుతం ఈ ప్రాజెక్టుకు సంబంధించిన పోస్టులు సామాజిక మాధ్యమాల్లో సందడి చేస్తున్నాయి.