‘RX’తో సరికొత్త ప్రయోగానికి సిద్ధమైన రెజీనా కసాండ్రా

తీవ్రమైన, శక్తివంతమైన పాత్రల నుంచి ఆకట్టుకునే కమర్షియల్ ఎంటర్‌టైనర్ల వరకు విభిన్నమైన పాత్రలతో నటిగా తన ప్రత్యేకతను చాటుకుంటున్నారు రెజీనా కసాండ్రా. ఇప్పుడు మరో ఆసక్తికరమైన ప్రాజెక్టుతో ప్రేక్షకుల ముందుకు వచ్చేందుకు సిద్ధమవుతున్నారు. ప్రముఖ నిర్మాణ సంస్థ మైత్రీ మూవీ మేకర్స్‌తో పాటు దర్శకుడు లోకేష్ కనగరాజ్‌కు చెందిన జి-స్క్వాడ్ నిర్మాణ సంస్థ ఈ సినిమా కోసం చేతులు కలిపాయి. శిల నేరంగళిల్ శిల మణితర్గళ్ చిత్రంతో గుర్తింపు తెచ్చుకున్న విశాల్ వెంకట్ ఈ సినిమాకు దర్శకత్వం వహిస్తున్నారు. తాజాగా ఈ చిత్రానికి RX అనే ఆసక్తికరమైన టైటిల్‌ను ఖరారు చేసిన మేకర్స్ రెజీనా కసాండ్రా ఫస్ట్ లుక్ పోస్టర్‌ను విడుదల చేశారు.

“నిజం కోసం చేసే పోరాటం అత్యంత ఒంటరి పోరాటంగా మిగిలిపోతుంది” అనే ఆసక్తికరమైన క్యాప్షన్‌తో విడుదలైన ఈ పోస్టర్‌లో రెజీనా సరికొత్త లుక్‌లో కనిపిస్తున్నారు. దీంతో సినిమాపై ప్రేక్షకుల్లో ఆసక్తి పెరిగింది. ఈ చిత్రంలో ఆమె పాత్ర చాలా కీలకంగా ఉండబోతుందనే అంచనాలు వ్యక్తమవుతున్నాయి. ఇప్పటికే విభిన్నమైన పాత్రలతో తన నటనకు గుర్తింపు తెచ్చుకున్న రెజీనా, RXతో మరో కొత్త ప్రయోగం చేయబోతున్నారు. ఈ సినిమాలో రెజీనాతో పాటు నాజర్, తిలక్ రమేష్ కీలక పాత్రల్లో నటిస్తున్నారు. ఫస్ట్ లుక్ విడుదలైనప్పటి నుంచి సోషల్ మీడియాలో చర్చ మొదలవగా, సినిమాలో రెజీనా పాత్ర ఎలా ఉండబోతోందనే ఆసక్తి అభిమానుల్లో నెలకొంది.