బిగ్‌బాస్‌ హౌస్‌లో నీతూ సెల్ఫ్‌ హర్ట్‌..

బిగ్‌బాస్‌ తెలుగు 10 హౌస్‌లో కంటెస్టెంట్ల మధ్య గొడవలు, వాగ్వాదాలు మరోసారి తీవ్రస్థాయికి చేరాయి. తాజా ఎపిసోడ్‌లో స్నేహాలు, నామినేషన్లు, వ్యక్తిగత విభేదాల చుట్టూ చర్చలు మొదలై చివరకు మాటల యుద్ధానికి దారితీశాయి. రామ్‌ ప్రసాద్‌, వర్షిణి మధ్య స్నేహం గురించి మొదలైన చర్చలో ఒకరిపై మరొకరు తమ అభిప్రాయాలను వెల్లడించారు. స్నేహితులమనే కారణంతో ప్రతికూల అంశాలను ప్రస్తావించకూడదని లేదని వర్షిణి స్పష్టం చేసింది. మరోవైపు త్రిగుణ్‌ వ్యవహారశైలిపై నీతూ నటరాజ్‌ అసహనం వ్యక్తం చేసింది. సుధీర్‌తో తనకున్న స్నేహం, అతడి ప్రవర్తన గురించి కూడా వర్షిణి వ్యాఖ్యలు చేసింది. అనంతరం నీతూ, త్రిగుణ్‌ మధ్య నామినేషన్‌ పాయింట్ల విషయంలో వాదన మొదలైంది. ఒకరి మాట మరొకరు వినకుండా మధ్యలోనే అడ్డుకోవడంతో వివాదం ముదిరింది. ఈ క్రమంలో వంశీ జోక్యం చేసుకోవడంతో పరిస్థితి మరింత వేడెక్కింది. వ్యక్తిగత విమర్శలు, ఘాటు వ్యాఖ్యలతో హౌస్‌లో ఉద్రిక్తత నెలకొంది.

కుటుంబ సమస్యలు, ఆర్థిక ఇబ్బందుల ప్రస్తావన రావడంతో నీతూ మరింత ఆగ్రహానికి గురైంది. త్రిగుణ్‌ తన కుటుంబ కష్టాల గురించి మాట్లాడుతున్న సమయంలో అతడిని జోకర్‌ అని వ్యాఖ్యానించింది. ఈ వాగ్వాదం కొనసాగుతుండగానే నీతూ ఒక్కసారిగా తన చెంపపై తానే కొట్టుకోవడం హౌస్‌మేట్స్‌ను ఆశ్చర్యానికి గురిచేసింది. గతంలో టాస్క్‌ విషయంలో అసహనంతో వంశీ తనను తాను కొట్టుకున్నప్పుడు హోస్ట్ నాగార్జున తీవ్రంగా స్పందించి, మరోసారి అలాంటి ప్రవర్తన చేయవద్దని హెచ్చరించిన విషయం తెలిసిందే. ఇప్పుడు నీతూ కూడా అదే తరహాలో ప్రవర్తించడంతో రాబోయే వీకెండ్‌ ఎపిసోడ్‌పై ఆసక్తి పెరిగింది. ఈ ఘటనపై నాగార్జున ఎలా స్పందిస్తారు? నీతూకు హెచ్చరిక జారీ చేస్తారా? గొడవకు దారితీసిన కారణాలను కూడా ప్రస్తావిస్తారా? అన్నది ప్రేక్షకుల్లో ఆసక్తికరంగా మారింది.